Nunatta avannarpasinnerpaartaani piniartut piniariarsinnaanngitsut

Avanersuarmi piniartut silarluttuarneranit ajornartorsiutitaapput.

Juulleriartornerani Avanersuarmi silarluttuarnera aalisartunut piniartunullu isertsitatigut eqquivoq.

Taamaammat Inatsisartut ajunaarnersuaqartillugu aningaasaliissutaat Avanersuarmut atorneqarsinnaanersut misissorasuaqqullugit Naalakkersuisunut Inatsisartuni ilaasortaq Qaanaameersoq Mikivssuk Thomassen kaammattuuteqarpoq.

Aamma aalisartut piniartullu kattuffiata KNAPK-p naalakkersuisut piniartunut immikkut ittumik piaarnertumik ikiorseeqquai.

Siorapalummut attavigaarput piniartut ilaat Nukappiannguaq Henriksen. Taanna oqaluttuarpoq silarluttuarmat iluamik piniariarsinnaanatik.

- Tassa novembarip ingerlanerani ajorteqattaartuaannarami, aamma una tikillugu. Massakkut taqqama ajorpoq. Niggerami isseqanngiivippoq ulluni kingullerni - anorerpalussuaq tasama avaterput. Ukiuni kingullerni tamavimmi ilaanni novembari imarsuusarpoq decembari tikillugu.

Tamannalu piniarnermut kingunerluppoq:

- Ukiut siuliini assorujussuaq piniartarnikuugaluarpugut qassusersorluta aamma avunga piniariartarfimmut Siorapaluup avannaanut Neqimut qassusersoriartortarnikugaluarpugut. Massakkut naamik taavunnarnissarluunniit kajungernarunnaarsikuuvoq imarortaqattaartalernikuugami ukiuni kingullerni.

Piniartut aningaasaqarnerat eqqornerlunneqartoq

Tamanna piniartut isertitaqarniarnerannut annertuumik sunniuteqarpoq:

- Suu assorujussuaq sunniuteqarami isertitaqarniarnissamut, soorlu makku puisit qassusersorluni pisamininguit inuinnarnulluunniit amii tuniniartaraluarpagut, taamaattoqarpianngilaq massakkut isertitaqarniarnissamut. Uagut maani Siorapalummi aalisagaqanngilagut aalisarsinnaanngilagut, Qaanaami aatsaat aalisartoqarsinnaagaluarpoq, aammali sikkorluppaluppoq massakkut.

Nukappiannguaq Henriksen oqarpoq taavani ukiorluujuitsuummat ukiorluunissaa eqqarsaatigalugu nammineq ileqqaagaqartarnani.

Ukiuni kingullerni silap allanngoriartornera malunnarnerarpaa:

- Suu allanngoriartoqaaaq, sila naatsorsorujuminaallinikuuvoq tassanngaannarsuaq anorlertunngortarami, naatsorsoruminaallisimaqaaq, massakkut ukiuni kingullerni.