Qaanaami piniartut aalisartullu ukiorlummit aamma eqqugaapput
Siorapalummi piniartut silarluinnavimmat piniarsinnaannginnamik isertitaaruttut, piniartoq Nukappiannguaq Henriksen sapaatip akunnerani kingullermi oqaluttuarpoq.
Siorapalulli kisimi taamaanngilaq.
Qaanaami oktobarimi sikoreertaraluartoq, aamma sikuniarpianngitsoq piniartoq, Qaanaami KNAPP-p siulittaasua Tobias Simigaq maanna oqaluttuarpoq.
Tassalu Qaanaarmiut suli qaleralinnialinngillat.
Qaanaamut, Qeqertanut Siorapalummullu qilalukkanik qernertanik ukioq mannamut pisassiissutaasunit 30-it kiisalu qilalukkanit qaqortartassiissutinit marluk suli pisarineqarsimanngillat.
Qaanaamut, Qeqertanut Siorapalummullu ukioq manna aavertasiissutaasunit 102-t suli aamma pisarineqarsimanngillat.
Aqutsiveqarfik Qaanaamut (Qaanaaq, Siorapaluk Qeqertallu) inuussutissarsiutigalugu piniartunut ukioq manna qulingiluanik nannuttassiissuteqarpoq. Siorna 2021-mi pisarinngitsuukkat arfineq pingasut ilanngullugit Aqutsiveqarfik Qaanaamut nannuttassiissutit katillugit 17-iupput. Ukioq manna maannamut arfineq pingasunik nannuttoqarsimavoq, taamaammallu Aqutsiveqarfik Qaanaami ukioq mannamut nannuttassani sinneruttut qulingiluaapput.
Qaanaamut, Qeqertanut Siorapalummullu ukioq manna qilalugartassiissutinit, aavertasiissutinit nannuttasiissutinillu pisarineqanngitsoortut aappaagumut pisassiissutissanut nuunneqassasut, Aalisarnermut Piniarnermullu Naalakkersuisoqarfimmit ilisimatitsipput.
Avannaata Kommuniata illoqarfiit nunaqarfillu innuttaqqortussusii pillugit paasissutissaatai naapertorlugit
Qaanaaq 619-inik
Siorapaluk 41-nik
Qeqertallu 26-nik inoqarput
Aalisartut piniartullu kattuffiat KNAPK naapertorlugu Qaanaami, Siorapalummi Qeqertanilu piniartut 60-it missaanniittut immikkut ittumik ikiorserneqarnissamik pisariaqartitsipput.
Qaanaap avataa aamma sikujumaataarpoq
- Aalisariarsinnaanngilagut massakkut. Qaanaap kangerluata ilummut sikua aserorterami, massakkut suli aniarujoorpoq. Sikuunerani taamaallaat aalisarsinnaasaratta, aasaanerani qilalukkat takkusimaarneranni qalerallit tammakartarmata.
Tobias Simigaq oqarpoq siku Avanersuarmi piniarnermut pingaarnerpaasoq.
- Sikoqarpianngilagut, aakanna kananeerannguaq imaq. Kaperlaallutalu umiartorniarsinnaanatalu qimusserniarsinnaanngilagut sikumineerannguarput eqqarsaatiginngikkaanni.
Aalisartut piniartullu isertitsissutissanik allanik periarfissaqanngillat
Qaanaami nunaqarfittaanilu piniartut allanik periarfissaqarpallaanngitsut ikioqqullutik saaffiginnittalersut Tobia Simigaq oqarpoq.
- Piniartut isertitaqarpiarsinnaanngillat massakkut. Aalisaatit taavalu puisinut qassutit atortaramikkit maani sikuunerani. Saaveriataarmat tassa piniutitik annaavaat.
Sikunngippallu ajornartoortoqarnissaa Tobias Simikkap ernummatigaa.
- Tassa sikutinnagu ajornartoortorujussuussapput immaqa ajornartoortorujussuussapput, tassa nalilerpara taamatut.
Naalakkersuisut ikiuunnissaat pisariaqartinneqartoq
Avanersuarmi piniartut ajornartoorneranni ikiorserneqaqqullugit KNAPK aamma inatsisartuni ilaasortaq Mikivssuk Thomassen naalakkersuisunut kaammattuuteqarput.
Qaanaamilu KNAPP-p siulittaasua aamma taama kissaateqarpoq:
- Juulli sioqqullugu ikiorneqarnissaat kissaatiginartorujussuuvoq. Meeralinnguit taamatut atugaqaqqunanngeqaat, soorlu pissaaleqillutik.
Tobias Simigaq oqarpoq.
Puisit amiinik Qaanaami tigooqqaasoqaraluartoq piniartunit amernik suli tunisisoqarsimanngilaq.
Tobias Simigaq aamma oqarpoq Avanersuarmi ukiorluunera peqqutigalugu qilalugartassat tamakkerneqarsimanngitsut.
Naalakkersuisut Avanersuarmi piniartunut ikiorsiissuteqarniarsut paasiniaaffigaavut, sulili iluatsinnagit.