Naalakkersuisut kukkuluttoreerlutik danskit ministeriat tikeraaqqinnissaa sulissutigaat
Oqaloqatigiinneq pitsaanerpaavoq, nunanullu allanut sillimaniarnermullu tunngasuni Danmarkip nunattalu akunnerminni ataatsimiissutigisarnissaat pingaaruteqartoq, nunanut allanut tunngasunut naalakkersuisoq, Steen Lynge (D) oqarpoq.
Jeppe Kofodilli (S) Nuummut tikeraarnera tamatumuuna iluatsitsiviuallaanngilaq.
Jeppe Kofodip Nuummiinnermini Inatsisartut Nunanut Allanut Sillimaniarnermullu Ataatsimiititaliaat, Steen Lyngelu ataatsimeeqatigiinnissaat pilersaarutaagaluarpoq. Ataatsimiinnissamulli piffissaq kingullikkut aggersaasoqarmat, ataatsimiititaliami ilaasortat katersuunnissamut piffissaqarsimanngillat, ataatsimeeqatigiinnissaraluallu taamaatiinnarpoq.
AAMMA ATUARUK Inatsisartut ataatsimiititaliaat: Danskit nunanut allanut tunngasunut ministeriata tikeraarnissaanik ilisimatinneqanngilagut
Kingusinaartumik aggersaasoqarnera ataatsimiititaliap siulittaasuanit, Aleqa Hammondimit (NQ) isornartorsiorneqangaatsiarpoq, ilaatigut ataqqinninnginneraalluni, isornartorsiuinerlu Steen Lyngep paasilluarsinnaavaa.
- Paasisinnaavara ataatsimiititaliaq angalasinnaasarmat, allanut aamma ilaasortaaffeqarmata. Taanna tunngavigalugu qisuariarnissartik allanngortikkuminaatsissinnaagaat, kisianni allatut iliorsinnaasimanngilanga, piffissaq sivikitsoq atorlugu qaaqqusissallunga. Naatsorsuutigisimavarput tikinnissaa, kisianni qulakkeersimanngilarput, ullualunnguit sioqqullugit aatsaat qulakkeersimagatsigut, taamaattumik taamatut pisoqarpoq, Steen Lynge oqarpoq.
Ataatsimiititaliap ataatsimeeqatigineqarnissaa juunimili pilersaarusiorneqalersoq, taassuma ilanngullugu oqaatigaa. Taamanikkullili pilersaarut ersarissimanngilaq.
Nunanut allanut ministerip ataatsimiititaliaq naapikkusukkaa
Inatsisartut Nunanut Allanut Sillimaniarnermullu Ataatsimiititaliaata isornartorsiuinerata kingorna, danskit nunanut allanut ministeriata nunatsinnukaqqinnissaa Steen Lyngep sulissutigeqilereeraa, naalakkersuisut nittartagaanni allassimavoq.
- Naalakkersuisoq Nunanut Allanut Ministeri, Nunanut Allanut Sillimaniarnermullu Ataatsimiitsitaliarlu Nuummi qanittumi ataatsikkut ataatsimiinissaq pillugu Naalakkersuisoq ataatsimiitsitaliarlu eqqartueqatigiikkusuppoq, naalakkersuisut allapput.
AAMMA ATUARUK Naalakkersuisoq: COVID-19 pissutigalugu qaaqqusissutit kingusinaarput
Danskit nunanut allanut ministeriata nunatsinnukaqqinnissani ajoriffissaqartinngilaa.
- Nunanut allanut tunngasutigut naalakkersuinikkut ingerlatsineq pillugu nassuiaat pillugu siorna oktobarimi ataatsimeeqatigaakka, tamannalu pingaartissimaqaara, periarfissanngorpallu naapeqqinnissaat eqqarsaatigaara, Jeppe Kofod oqarpoq.
Ataatsimiinnissarli suli ullulerneqanngilaq.
Danskit nunanut allanut ministeriata Naalakkersuisoq Steen Lyngep ataatsimeeqatigiartornerata saniatigut, Issittumi Sakkutooqarfik aamma Nunatta katersugaasivia pulaarpaa, asimilu pisuttuaqatigineqarluni.
