Inatsisartut ataatsimiititaliaat: Danskit nunanut allanut tunngasunut ministeriata tikeraarnissaanik ilisimatinneqanngilagut
Danskit nunanut allanut tunngasunut ministeriata, Jeppe Kofodip (Soc), Nuummut tikeraarnera arfininngormat unnukkut aallartippoq.
Nunanut allanut tunngasunut naalakkersuisoq, Steen Lynge (D), ullumi ataasinngornermi ataatsimeeqatigissavaa. Inatsisartullu Nunanut Allanut Sillimaniarnermullu Ataatsimiititaliaanni ilaasortat ualeru aamma ataatsimeeqatigissavai.
Tunngaviatigut ataatsimeeqatigiissapput. Ataatsimiititaliamimi siulittaasuata Aleqa Hammondip (NQ) oqarnera naapertorlugu ataatsimiititaliaq Jeppe Kofodimik ataatsimeeqateqarnissaminut piffissaqanngilaq.
Ataatsimiititaliarmi danskit nunanut allanut ministeriata nunatsinnut tikeraartussaaneranik ilisimatinneqarsimanngitsoq, Aleqa Hammond oqarpoq. Danskit ministeriata tikeraarnissaanik nutaarsiassaq ataatsimiititaliap tallimanngormat ualikkut - tikinnissaanut nalunaaquttap akunneri 24-nnanngortut - ministereqarfiup nittartagaani atuarmagu paasisimavaa.
AAMMA ATUARUK Qallunaat nunanut allanut ministeriat nunatsinnut sapaatit akunnerat naappat tikeraassasoq
- Danskit nunanut allanut tunngasunut ministereqarfiata ataatsimiititaliamut piffissaq kingulleq atorlugu nassitsinera, inatsisartut ataatsimiititaliaannut inatsisartullu suliaannut ataqqinninnginnertut nalilerusuppara, Aleqa Hammond KNR-imut oqarpoq.
- Ataatsimiitsitaliamil ilaasortat amerlanerpaartaat Nuup avataani najugaqarput ilaalu angallallutik. Taamaammat piffissaq kingulleq atorlugu qaaqqusinera kipiluttunarpoq. Qanorsuarluunniit peqataarusutsigigaluarutta peqataanissatsinnut periarfissaqanngilagut.
- Danskit nunanut allanut tunngasunut ministeriata issittoq pillugu periusissiaq nutaaq pillugu naapikkusukkaatigut siulittaasutut nammineq ilisimasimagaluarukku, angalanissatsinnut pilersaarutivut allatut isikkoqarsimassagaluarput.
Ataatsimiititaliaq Jeppe Kofodimik ataatsimeeqateqarnissap taamaatinneqarnissaanut Aleqa Hammondip oqarnera naapertorlugu isumaqataavoq.
Naligiiffiusumik ataqqeqatigiiffiusumillu suleqatigiinneq
Jeppe Kofod danskit nunanut allanut tunngasunut ministereqarfiata nittartagaani ima issuarneqarpoq:
”Uummaarissumik, naligiiffiusumik, ataqqeqatigiiffiusumik, piffissarlu ilutigalugu ineriartorfiusumik, naalagaaffeqatigiinnerup qulakkeerneqarnissaa uannut pingaartuuvoq.”
Ima aamma allaqqasoqarpoq:
”Naalagaaffeqatigiinnermi nunanut allanut tunngasunut sillimaniarnermullu politikkikkut suleqatigiinneq nunanut allanut tunngasunut ministeriata ukkatarisaata ilagivaat, taassumalu ilaatigut Naalakkersuisut Kalaallit Nunaata inuinut sunniuteqartumik nunanut allanut tunngasunut sillimaniarnermullu politikkikkut suleqataanerunissaat qulakkeerumallugu suleqatigiinnerulernissamut periarfissat tikeraarnini iluatsillugu eqqartorniarpai.
Allanik pisussaaffeqarpugut
Aleqa Hammondillu tamanna mamiatsaatigaa.
- Naalagaaffeqatigiinnermi ataatsimut sulinermi naligiissutsip ataqqeqatigiinnerullu tunngavissaatinneqartariaqarnerat ataatsimiititaliamit isumaqatigineqarpoq, Aleqa Hammond tusagassiutinut nalunaarumminni allappoq.
- Taamaammat tamanna eqqarsaatigalugu Nunanut Allanut Sillimaniarnermullu Ataatsimiititaliap paasissutissiiviusumik ataatsimiinnermut qaaqqusissut ataatsimiinnissaq ullualunnguanik sioqqullugu aatsaat tigummagu uggornartorujussuuvoq. Ataatsimiititaliami ilaasortat Inatsisartut ataatsimiititaliaanni allani pisussaaffeqarmata allanik ataatsimiititaliaq ajoraluartumik taama sivikitsigisumik piffissaqartitsilluni paasissutissiiviusumik ataatsimiinnermut peqataasinnaanngilaq.
KNR nunanut allanut tunngasunut naalakkersuisoqarfimmut attaveqarniarsarivoq.
