Qallunaat nunanut allanut ministeriat nunatsinnut sapaatit akunnerat naappat tikeraassasoq

Qallunaat nunanut allanut ministeriat, Jeppe Kofod, nunatsinnut sapaatit akunnerat naappat tikerassaaq.

Danmarkip nunattalu attaveqatigiinnerata nukittorsarnissaa tikeraarnikkut anguniarpaa. nunanut allanut ministerip tikeraarnermini ilaatigut nunanut allanut tunngasunut naalakkersuisoq, Steen Lynge (D), ataatsimeeqatigissavaa. 

AAMMA ATUARUK Pompeo Københavnimut tikittoq: Issittoq Pituffillu oqallisigaavut

Taakkua aamma Inatsisartut Nunanut Allanut Sillimaniarnermullu ataatsimiititaliaat ataatsimoorlutik ataatsimeeqatigissavaat.

Danmarkip nunanut allanut ministereqarfia tusagassiutinut taama nalunaarpoq.

Ataatsimiinnermi suleqatigiinnerup nukittorsarnissaanut periarfissat ukkatarineqassapput. Tassalu Naalakkersuisut nunanut allanut sillimaniarnermullu tunngasuni kalaallinut inuiannut pingaaruteqartuni maannarnit akuunerulernissaat qulakkeerniarneqassaaq.

- Nalagaaffeqatigiinnerup, ineriartorneq ilutigalugu ineriartortuartup, uummaarissuunissaata, nalingiiffiunissaata ataqqeqatigiiffiunissaatalu qulakkeerniarnissaa uannut pingaartorujussuuvoq, Jeppe Kofod oqarpoq.

- Tamanna aamma nunanut allanut sillimaniarnermullu tunngasuni atuuppoq. Naalakkersuisoq Steen Lynge uangalu tamakkorpiaat pillugit oqallinnerit juulimi naapikkatta aallartilluarpagut oqaloqatigiinerullu nanginnissaanut qilanaarpunga, Jeppe Kofod oqarpoq. Taassuma USA-p nunanut allanut ministerianik Københavnimi juulip 24-ani ataatsimeeqateqarnertik tamatumani innersuussutigaa.

Jeppe Kofod arfininngornermi aggustip 22-aniit ataasinngorneq 24-at ilanngullugu tikeraassaaq.