Naalakkersuisoq: COVID-19 pissutigalugu qaaqqusissutit kingusinaarput

Nunanut allanut sillmaniarnermullu tunngasut pillugit Danmarkip nunattalu akornanni atatsimeeqatigiittarnerit pingaartuupput. Ataatsimiinnerillu pisinnaagaangata ingerlattarnissaat pingaaruteqarpoq.

Nunanut allanut tunngasunut naalakkersuisoq, Steen Lynge, tusagassiutinut allagaqarluni taama maanna nalunaarpoq.

Taanna Nunanut Allanmut Sillimaninarnermullu Ataatsimiititaliap, Steen Lynge nammineq Danmarkillu nunanut allanut ministeriata, Jeppe Kofodip ippassaq ataatsimiinnissaraluisa malitsigisaaanik taama nalunaaruteqarpoq.

Ataatsimiititalialli siulittaasuata oqarnera naapertorlugu ataatsimiititaliaq ataatsimiinnissaq pillugu tallimanngormat aatsaat ilisimatinneqarpoq, taamalu piffissakitsigitillugu ilaasortat tamarmik Nuummi katersuutsinnissaat ajornarsimavoq.

Steen Lynge allappoq, nammineq ataatsimiititaliarlu nunanut allanut ministerimik Nuummi ataatsimeeqateqarnissamut periarfissat misissussagitik.

- Covid-19-ertoqarnera pissutigalugu angalanissat inaarutaasumik inissinneqarnissaat ajornakusoornartarpoq. Taamaattumik Nunanut allanut Ministerip tikeraarnissaata tungaanut ullut ikitsunnguit kiserngorummata aatsaat inissivissimavoq. Tamanna pissutigalugu ajoraluartumik ataatsimiinissamut qaaqqusissut kingusissukkut nassiuttariaqarsimavara, Steen Lynge tusagassiutinut nalunaaruteqarpoq.

Qaammatisiutit immersornerat peqataasussanut tamanut eqquutsinnissaat aamma ajornakusoornarsinnaasoq taassuma oqaatigaa.

Tamatuma saniatigut Inatsiartut ataatsimiititaliaasa siunissamut ungasinnerusumut pilersaarusiortarnerat, ataatsimiinnissallu siusinaarluarluni nalunaarutigisarnissaat pingaartuusoq paasilluarnerarpaa.

Ataatsimiititaliami Inuit Ataqatigiit ilaasortaatitaat aamma isornartorsiuteqarput. 

AAMMA ATUARUK Inatsisartut ataatsimiititaliaat: Danskit nunanut allanut tunngasunut ministeriata tikeraarnissaanik ilisimatinneqanngilagut

- Uagutsinnut uggornaqaaq Naalakkersuisut ataatsimiititaliamut piffissaagallartillugu ilisimatitsisimanngimmata ataatsimeeqatigiinnissarlu inissillugu, ataatsimiititaliap siulittaasuata tullia Mimi Karlsen aamma ilaasortaq Sofia Geisler allapput. 

Steen Lynge tusagassiuuutinut nalunaaruteqarluni oqarpoq,
Nunanut Allanut Sillimaniarnermullu Ataatsimiititaliaq peqatigalugu, danskit nunanut allanut ministeriata  Nuummi ataatsimeeqatiginissaanut eqqartueqatigiikkusulluni. 

AAMMA ATUARUK IA ministerimik ataatsimeeqaterniarunnaarnermut: Uggornarpoq peqqusiileqinarlunilu

Kiisalu Inatsisartut Ataatsimiitsitaliaat piffissaq eqqortoq atorlugu suliassatik pilersaarusiortaraat paasinartoq, Steen Lynge tusagassiuutinut nalunaaruteqarluni taama allappoq.