Assi: Scanpix

IA ministerimik ataatsimeeqaterniarunnaarnermut: Uggornarpoq peqqusiileqinarlunilu

Sooruna naalakkersuisoqarfiup ministerimik tikeraartoqarnissaanik Nunanut Allanut Sillimaniarnermullu Ataatsimiititaliaq piffissaagallartillugu ilisimatissimanngikkaa, Inuit Ataqatigiit aperipput.

Uggornarpoq peqqusiileqinarlunilu. 

Inuit Ataqatigiit Inatsisartut Nunanut Allanut Sillimaniarnermullu Ataatsimiititaliaata nunanut allanut ministerimik, Jeppe Kofodimik, atatsimeeqateqarniarunnaarnera pillugu taama naliliipput.  

Taanna Nuummi arfininngormat aallartittumik aqagulu nammassisussamik tikeraatsiarpoq.

AAMMA ATUARUK Inatsisartut ataatsimiititaliaat: Danskit nunanut allanut tunngasunut ministeriata tikeraarnissaanik ilisimatinneqanngilagut

Taassuma Nunanut Allanut Sillimaniarnermullu Ataatsimiititaliaq ullumi naapittussaagaluarpaa – ataatsimiititalialli siulittaasua Aleqa Hammond (NQ) naapinnissap taamaatiinneranik nalunaaruteqarpoq. Ataatsimiititaliarmi ministerimik naapitsinissamut piffissaqanngilaq. 

Ajuusaarnaqaaq

- Danskit nunanut allanut ministereqarfiata ataatsimiititaliamut piffissaq kingulleq atorlugu nassitsinera, inatsisartut ataatsimiititaliaannut inatsisartullu suliaannut ataqqinninnginnertut nalilerusuppara, Aleqa Hammond KNR-imut oqarpoq.

Ministerip tikeraarnissaanik ataatsimiititaliaq tallimanngormat ilisimatinneqartoq, taanna oqarpoq – tassalu Jeppe Kofodip Nuummut minnissaanut ulloq ataasiinnanngortoq.

Tamannalu uggornarlunilu kiinaannguusaarnartoq, Inuit Atatqatigiit ataatsimiititaliami ilaasortai isumaqarput:

- Uagutsinnut uggornaqaaq Naalakkersuisut ataatsimiititaliamut piffissaagallartillugu ilisimatitsisimanngimmata ataatsimeeqatigiinnissarlu inissillugu, ataatsimiititaliap siulittaasuata tullia Mimi Karlsen aamma ilaasortaq Sofia Geisler allapput.

AAMMA ATUARUK Danskit ministeriata nunarput Issittoq pillugu nutaamik periusissiornermi suleqatigerusukkaa

- Peqqusiileqinarpoq Inatsisartut ataatsimiititaliaannut, politikkikkullu aqutsinermut tamarmut, isiginninneq innarlerneqartoq takusinnaallugu. Ajuusaarnaqaaq, taakkua nangipput. 

Ilasortat IA-meersut allagaat naapertorlugu ministerip tikeraarnissaanik, ataatsimiititaliaq taassuma tikinnissaanut ullut marluinnangortut ilisimatinneqarput.

Sofia Geisler Mimi Karlsenilu aamma oqarput, taamaalinerani ataatsimiititaliap ilaasortaasa amerlanersaat Nuup avataani ataatsimiinniassagamik piffissaarutereersimasut – taamaammallu ministeri naapissinnaanagu.

Naalakkersuisoqarfik suli akinngitsoq

- Nunanut Allanut Sillimaniarnermullu politikki Nunatsinni partiit tamarmik tunuliaqutsigaat qanoq pingaaruteqartigisoq Inuit Ataqatigiinniit arlaleriarluta oqariartuutigisarparput. Tamannami pinngippat nunanut allanut sillimaniarnermullu tunngasut allat avatitsinniit aqussavaat, taamaattoqarneranilu naatsorsuutigiuaannarsinnaanngilarput nunatta soqutigisaasa salliutinneqarnissaat, tusagassiutinut allakkaminni taakkua allapput.

- Nunanut Allanut Nukissiuuteqanermullu Naalakkersuisup ilisimatittariaqarpaatigut nunanut allanut ministerip tikeraarnissaa qanoq sivisutigisumik siuningaaniit ilisimareersimanerlugu, aammalu tikinnissaa ullualunnik sioqqullugu ataatsimiitsitaliamut ilisimatitsineq sumik pissuteqanersoq, taakkua nangipput. 

Isornartorsiut KNR-ip Nunanut Allanut tunngasunut nalakkersuisoqarfimmiit ullup ilaa tamangajaat akissutissasiniaraluarpaa, sulili iluatsinnagu. 

Isummersuutit

inatsisartut-sal-sep2019.jpg

Inatsisartut Ukiakkut Ataatsimiinnerat



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat