Danskit ministeriata nunarput Issittoq pillugu nutaamik periusissiornermi suleqatigerusukkaa
Issittoq nunarpullu nunanit tamalaanit soqutigineqaleraluttuinnarnerat ilutigalugu Danmarkip nunatsinnik Issittoq pillugu nutaamik periusissiornermi qanimut suleqateqarnissani pingaartippaa.
Danskit nunanut allanut tunngasunut ministeriat, Jeppe Kofod (S) taama oqarpoq.
- Kalaallit Nunaannik naalagaaffeqatigiittullu sinneri naligiiffiusumik patajaannerusumillu suleqatigiinnissarput pingaartittorujussuuara.
- Issittumut tunngatillugu suleqatigiinnissarput tamatumanilu periarfissavut unammillernartullu suunersut misissornissaat pingaaruteqarpoq. Aammali nunanut allanut sillimaniarnermullu politikkikkut qanoq suleqatigiilluarsinnaanersugut eqqartussavarput, Jeppe Kofod oqarpoq.
Issittoq pillugu nutaamik periusissiortoqarnissaa pisariaqarluinnartoq, Kofodip siusinnerusukkut oqaatigaa.
Sakkutuunik amerlisaaneq silallu pissusiata allanngoriartornera
Pissutsit silap pissusiata allanngoriartornerata Issittullu politikkikkut inissisimaneranik soqutiginnittoqaleraluttuinnarnerata kingunerisaannik allanngoriartupiloornerannik peqquteqartoq, taanna oqarpoq.
- Pissutsit allanngoriartupiloorput. Rusland sakkutuuminik amerlisaavoq. Issittumi sorsunnerup nillertup nalaani sakkutooqarfiusimasut ilaat ammaqqinneqarput. Silallu pissusia aamma allanngoriartorluni.
AAMMA ATUARUK Aaja Chemnitz: Issittoq siunissami immaqa saqitsaaffiussaaq - taava qanoq iliussaagut?
- Danmarkip Kalaallit Nunaatalu naleqartitaat tunngavigalugit suleqatigiilluarnissatsinnut qanoq iliornissatsinnik qulaajaanissarput soorunami pingaaruteqarpoq. Suleqatigiiffigilluartariaqakkavut amerlapput, Jeppe Kofod oqarpoq.
Issittoq pillugu maanna periusissiaq 2011-mi atulertoq 2020-p naanerani atorunnaassaaq. Taanna Danmarkip, nunatta Savalimmiullu nunanik tamalaanik ataatsimut suleqateqarnerannut sinaakkusiivoq.
Ukiaru saqqummiunneqassasoq
Naalagaaffeqatigiittulli tamarmik periusissiami nutaami imminnut ilisarisinnaasariaqartut, Jeppe Kofod isumaqarpoq.
Taamaammat nunatta Savalimmiullu suleqatigineqarnissaat inuttaata pingaartippaa.
- Naalagaaffeqatigiittut suleqatigiilluarutta nukittunerussaagut, taanna oqarpoq.
Kofodip Issittoq pillugu periusissiaq nutaaq inaarutaasumik missingiut Danmarkip, nunatta Savalimmiullu naalakkersuisuinut ukiaru saqqummiukkumaarini ilimagaa.
Inaarutaasumik periusissiaq 2021-p aallartinnerani saqqummiunneqassasoq siunertaavoq.