Aaja Chemnitz: Issittoq siunissami immaqa saqitsaaffiussaaq - taava qanoq iliussaagut?

Danskit nunanut allanut tunngasunut ministeriat, Jeppe Kofod (S), Dansk Institut for Internationale Studierimut suliakkiuteqarpoq.

Ilisimatuummi Issittumi sillimaniarnermut politikkimi pissutsit issittumi periusissiarineqartup nutaap ilaanniittussaq paasiniaaffigeqqissaassavaat.

Tamanna Folketingip Kalaallit Nunaannut ataatsimiititaliaani tallimanngornermi danskit nalunaaqutaat naapertorlugu ualikkut isumasioqatigiittoqarnerani saqqummersinneqarpoq.

USA issittumi inissisimanerminik qulakkeerinniarnerani, Kina Issittumi sunniuteqarneruniarluni periarfissarsiorpoq. Taamaalineranilu Ruslandip issittumi sakkutooqarnini annertusarpaa.

AAMMA ATUARUK Venstrep Issittumut oqaaseqartartortaava: Issittoq eqqissisimanartuujunnaarpoq

Pissaanilissuillu Issittumik ukkatarinninnerat Folketingimut ilaasortanit nunanullu allanut ministerimit ernummatigineqarpoq. Tamanna Issittup saqitsaaffiunnginneranut takussutissaqarnissamut assersuisoq, Inuit Ataqatigiinneersoq, Aaja Chemnitz Larsen, isumaqarpoq. 

- Saqitsaaffiunnginnissaanik kissaateqarnerput oqaatigisaqattaaginnassanngikkipput pingaaruteqarsoraara. Aamma pissutsit piviusut eqqarsaatigisariaqarpagut, isumasioqatigiinnermi oqarpoq.

- Kalaallit Nunaat siunissami saqitsaaffiulissagaluarpat qanoq iliussaagut? Aaja Chemnitz Larsen nangilluni aperivoq.

AAMMA ATUARUK Immikkoortortaqarfittaaq Issittumi isumannaallisaaneq pillugu ilisimatusarfiussasoq

Pissaanilissuit akeqqersimaarnerat Issittumiinnaq malunnanngitsoq, Jeppe Kofod oqarpoq.

- Sillimaniarnermut politikkimi maannakkut inissisimanerput nutaarluinnaavoq aamma issitumi, nunanut allanut ministeri oqarpoq.

Tamannalu pissutigalugu Dansk Institut for Internationale Studierip Issittumi sillimaniarnermut misissueqqissaarnissaanik suliakkerpaa. Taannalu juunip aallartinnerani saqqummiunneqassaaq.

Misissueqqissaarneq kunngeqarfiup Issittumut periusissiassaanik nutarsakkamik suliaqarnermi tapertaasussatut isumaliutigineqarpoq.