Naalakkersuisut Kommune Kujallerlu allamut inissiisarnerit ikilisinniaraat
- Meeqqat pillugit suliassat 800-t sinneqarput, isumaginninnermut aamma innarluutilinnut tunngasuni suliassat 1000-t sinneqarput, taakkunanilu pinartut 500-t sinneqarlutik.
Taamak Kommune Kujallermi borgmesteriusimasup Stine Egedep (IA) ukioq kingulleq paasivaa, taamaattumillu isumaginninnermut tunngasut naalakkersuisunut tunniuttariaqalerlugit.
Tamatuma kingorna kommuninut qinersisoqarpoq nutaanillu aqutsisoqalerluni, Kommune Kujallermilu borgmesterinngortup, allamut inissiinermi suliat amerlasuut pillugit aaqqiissuteqarniarluni naalakkersuisunik suleqateqarnissamik isumaqatigiissuteqarpoq.
- Kommunitta angisussaanut naleqqiullugu meeqqat angerlarsimaffiup avataanut inissinneqarsimasut amerlavallaarput, borgmesteri Malene Vahl Rasmussenip (D) tusagassiorfinnut nalunaarutaani allaqqavoq.
- Sakkortuumik misigisarpassuaqarnerit meeqqanik sumiginnaanerujussuarnernik kinguneqartut, isumaginninnikkut ajornartorsiutinit annertuunit aallaaveqartunik unammilligassaqartugut tamassuma takutippaa. Pisariaqarpoq ataatsimoorluta aaqqivigisariaqarnissaat, taanna oqarpoq.
Siusissukkut iliuuseqartarnissaq
Naalakkersuisut Kommune Kujallerlu akunnerminni maajip 13-iani ukiuni marlunni tassa 2025-miit 2026 ilanngullugu atuuttussamik isumaqatigiissusiorput.
Allamut inissiinerit ikilisinnissaannut suliniutit iliuusissallu sorlerpiaat atorneqassanersut, tusagassiorfinnut nalunaarutaanni allaqqanngilaq. Allamulli inissiinissaq pinaveersaartikkusullugu, siusinaarluni ilaqutariit ajornartorsortut ikiorneqartarnissaat ukkatarineqassasut allaqqavoq.
- Pingaarnerpaatut sammineqartussat tassaapput siusissukkut iliuuseqarneq, pinaveersaartitsineq kiisalu meeqqat, inuusuttut ilaqutariillu akornanni atugarliornermi inuunillit atugarissaarnerisa pitsaanerulersinnissaat, Meeqqanut, Inuusuttunut, Ilaqutariinnullu Naalakkersuisoq, Mads Pedersen (IA) allappoq nangillunilu:
- Meerartatsinnut inuusuttortatsinnullu aamma ilaqutariinnut inuunerminni atugarliorlutik inissisimasunut siorngarnit annertunerusumik suliatigut tunngavissiilluarnermik ikorfartuinissatsinnut immikkullu ittumik suliniuteqarfiginissaannut qilanaarpunga.
Kommune Kujallermi meeqqat, inuusuttut ilaqutariillu ajornartorsiortut qanoq ikiorniarneqassanersut pillugit itisiliinerusumik akissutissarserusullutik, KNR naalakkersuisunut saaffiginnippoq.
