Assammik arsarnermi nunanut allanut unammisartunut sungiusaasoq sungiusaasuuginnassasoq
Angutit assammik arsarnermi nunanut allanut unammisartuisa sungiusaasuat, Johannes Groth sungiusaasuuginnassaaq. Kattuffiummi TAAK-ip sungiusaasumut isumaqatigiissut sivitsorpaa.
TAAK-ip siulittaasuata, Carsten Olsenip oqarnera naapertorlugu isumaqatigiissummik sivitsuineq nunatsinni assammik arsarnermi alloriarneruvoq pingaaruteqartoq.
- Isumaqatigiissutip sivitsornerata takutippaa Kalaallit Nunaani assammik arsarneq pingaarutilimmik alloriartoq. Qularutissaanngilaq Groth-ip misilittagaqarluarnermini periusissiassanullu eqqarsariartaasiata angutit nunanut allanut unammisartut qaffatseqqissinnaagai. Siunissamut assammik arsarnerup pimoorussamik aallussiniarnermut ilaalluinnarluni, qulakkeerinnissallunilu nunarsuatsinni unammisarnerni unammillersinnaanngornissamut. Piorsarsimassutsip piujuaannarnissaanut ataatsimoorpugut, isumalluarnartunut, ataatsimoornermut ajugaarusussuserlu sikkersillugit, Carsten Olsen tusagassiuutinut nalunaarummi oqarpoq.
Tunngaviusumik nukittuinissaq
Johannes Groth angutinut nunanut allanut unammisartunut sungiusaasutut 2023-mi toqqarneqarpoq, tassungalu isumaqatigiissut nutaanngortillugu 2031-mut sivitsorneqarpoq. Taanna arnanut nunanut allanut unammisartunut aamma sungiusaasuunikuuvoq.
Nunanut allanut unammisartunut sungiusaasup piffissap ungasinnerusoq eqqarsaatigalugu periusissiaq angusaqarfiunerusarsorai.
- Imaanngilarli piffissami qaninnerusumi angusaqarluarsinnaanngitsugut, kisianniliuna Kalaallit Nunaani assammik arsarnerup tunngaviusumik nukittunissaanik ineriartornissaanut soqutiginartikkiga, Johannes Groth oqarpoq.
