Trumpip Golden Dome-mik pilersaarutai Koreap Avannarliup ulorianarluinnartutut taavai
USA-p præsidentiata Donald Trumpip pilersaarutaa “Golden Dome” Korea Avannarliup isornartorsiorlugu “navianarluinnartutut” silaannaallu sakkulersorneqarnerulernissaanut siuarsaasuusutut taavaa.
Korea Avannarlermi tusagassiuutit taama allattut, Nutaarsiassaqartitsivik AFP allappoq.
“Golden Dome” USA-p rakettinut illersornissamut pilersaarutigaa annertooq.
Aningaasartuutit 175 milliardit dollariunissaat, tassa 1150 milliardit koruuniunissaat naatsorsuutigineqarput, Trumpillu suliniut „nunatta iluatsitsilluarnissaanut - allaat aniguinissaanut pingaaruteqarluinnartutut“ taavaa.
Korea Avannarlermi nutaarsiassaqartitsivik naalagaaffimmit pigineqartoq KCNA naapertorlugu Korea Avannarlermi nunanut allanut ministereqarfik “Golden Dome” pillugu nalunaaruteqarsimavoq.
Tassani illersornissamut aaqqissuussaq "nunat atomimik sakkussiallit isumannaatsuunerminnik soqutigisaannik akornusiisutut navianartorsiutitsingaartutullu" suliniutitut nassuiaatigineqarpoq.
Aammattaaq USA “avataarsuanik sakkulersuinissamik aalajangiusimannittorujussuartut“ pasillerneqartoq, Korea Avannaata nunanut allanut ministereqarfianit oqaatigineqarpoq.
- Amerikap rakettinut illersornissamut pilersaarutaa atominik nunarsuarmi avataarsuanilu atortussanik sakkussiornissamut unammillertoqaqqinnissaanut pissutaanerpaasutut nassuiaatigineqarpoq, tamannalu nunat atomimik sakkussiallit isumannaatsuunerannik ernumalersitsinikkut atomillu atorlugit avataarsuanik sorsuffiulersitseriaannaanikkut pivoq.
Nunat atomimik sakkussiallit
USA-p, Korea Kujalliup isumannaallisaanikkut iligisaata, ukiuni kingullerni nunap immikkoortuani sakkutooqarnikkut sungiusarnerni peqataasarnini annertusarpaa, ilaatigut sorsuutit timmisartut aallartarfii aqqartartullu atorlugit. Korea Avannarleq arlaleriarluni imminut atomimik sakkussiaateqartutut „allanngortinneqarsinnaanngilluinnartutut“ taasarpoq, kiisalu USA-p Koreallu Kujataata sungiusaqatigiittarneri tiguaasinnaanissaminnut piareersaataanerartarlugit.
Aamma Kinap siusinnerusukkut USA-p “Golden Dome”-mik pilersaarutaa ernumagalugu oqariartortarpoq. Ilaatigut USA “nunarsuup patajaassusaanik” akornusersuisutut nunap pasillertarpaa.
“Golde Dome” pillugu suli sukumiinerusumik saqqummiussisoqanngilaq.
/ritzau/
