Ikerasammiit Qeqertamut aqquserniornissamut kissaat illua-tungiliuttut isoraat
Avannaata Kommuniani suleqatigiit amerlanerussuteqartut, Siumut Nalerarlu nunaqarfiit marluk akornanni aqquserniornissamik pilersaaruteqarput. Tamanna aasaq mannamiit misissorneqalissasoq, borgmesteri, Lars-Erik Gabrielsen KNR-mut siusinnerusukkut oqarpoq.
Tamannali illua-tungiliuttut tamarmik, tassa Demokraatit, Atassutip IA-llu akerleralugu tusagassiorfinnut apuuppaat. Borgmesterip tulliata aappaa, Demokraatineersoq, Heidi Møller pilersaarummik ernummatiginnippoq.
- Piviusorsiorpallaanngitsunik pilersaarutinik suliniuteqarnialernerat, aasaq mannamit aallartereertussatut oqaatigineqartoq, assorujussuaq ernumaammissutigivarput, taanna oqarpoq.
Apeqqusiisoq
Taassuma suliniut kikkut iluaqutigissaneraat apeqquserpaa.
- Kikkunuku iluaqutissaat angalannermut tunngatillugu? Upernavimmiut Qaanaarmiut qanorluunniit taakkununnga iluaqutaanavianngilaq. Pilliuteqaqataasussaallutillu taamarujussuaq, Heidi Møller oqarpoq.
Siumut Nalerarlu angallannerit kinguaattoortut ikilisikkumallugit aqquserniornissamik pilersaarput. Qeqertamit Ikerassammut silaannakkut titarlugu 40 kilometerit missaannik isorartussuseqarpoq. Aqqusiniliortoqassappalli marloriaammik isorartutigissasoq Heidi Møller naliliivoq. Taamaammallu kommunip aningaasatigut tamanna nammassinnaanngikkaa taanna isumaqarpoq. Assersuutissaqarpormi:
- Ilulissani massakkut mittarfitsinninngaanniit arctic-imut, aqquserngup silillineriinnaanut, qinigaaffik kingulleq 20 millioninik kommuni aningaasartornikuuvoq.
- Taamaammat takorlooruminaappoq akissaa atortussallu qanorluunniit assartorneqaqqaartussaallutik akisoorujorujussuusussaavoq, Heidi Møller oqarpoq.
Akileraarut qaffassinnaasoq
Aqquserniortoqassappat tamanna akileraarutip maanna 44 procentimiittup, procentimik ataatsimik qaffanneratigut piviusunngortitsisoqarsinnaasoq, borgmesteri siusinnerusukkut oqarpoq.
Avannaata Kommuniani kommunalbestyrelsip maanna atuuttup siulia kommunip avinnissaa pillugu innuttaasunik taasititsinikuuvoq. Suliaq maanna suliarineqarpoq. Avinnissarlu piviusunngussagaluarpat aqqusinissaq kimit akilersorneqassanersoq aamma apeqquserneqarpoq.
- Kommunillu avinneqarnissaat aamma eqqartorneqalereernikuusoq, pilersaarusiorneqalereernikuusoq, avissappata kikkut taava aningaasartaanik akilersuisussanngortitaassappat? Heidi Møller oqarpoq.
