Qeqertap Ikerasaallu akornanni aqqut timmisartukkut angallannermut qajannartumut iluaqutaassasoq

Angalaqqinnissamut ulloq ataaseq utaqqinikuuit? Sapaatip-akunnera? Sapaatit-akunneri arlallit?

Taava kisimiinngilatit. Nuna tamakkerlugu angallannermi ajornartorsiutit ilisimaneqarluarput – aamma Avannaata Kommuniani. Ilulissat, Uummannaq taakkulu eqqaaniittut nunaqarfiit akornanni angalaniarnermi Ilulissanit sapaatini akunnerni arlalinni aallarnaveeqqaneq misigineqartarpoq. 

Timmisartut qulimiguullillu aallarsinnaasannginnerannut ilaatigut sila peqqutaasarpoq. Kisianni Avannaata Kommuniani Siumup Naleqqallu isumaat naapertorlugu aaqqiissutissaqarpoq.

Taakku Qeqertamiit Ikerasaap tungaanut aqqutiliortoqarnissaa kissaatigaat.

- Allamik immaqa periarfissaqanngilagut pitsaanerusumik. Ukiut qulit qiviarutsigit aasaariaaseqarpugut pujortorujussuusarluni putsertorujussuusarluni taavalu aamma imaatigut angallannermi Nuussuaq uiarlugu angallannermi angalariaaseq aamma qatsugasuaannartorsuunngimmat, borgmesteri, Siumumeersoq, Lars Erik Gabrielsen oqarpoq.

Uummannamit Ilulissanit imaatigut aqqusinikkullu

Suleqatigiit pilersaarutaat imaappoq, tassa angalasut soorlu Ilulissanit imaatigut Qeqertamukartassapput. Qeqertamit Ikerasammut qamutinik motorilinnik ingerlasassapput Ikerasammiillu Uummannap Sulluani apuuffissaminnut imaatigut aamma angalaqqissallutik. Uummannap Sulluanit Ilulissiarniartut aqqut taanna aamma atortassavaat.

- Aallaraanni tikinniaraanniluunniit apeqquserneqarsinnaannginnerusumik angalariuseqarnissaq piumavarput. Naak soorunami timmisartuutileqatigiiffeqaraluarpugut kisianni taanna naluara qanoq aaqqikkaanni pitsaanerulersinnaasimanersoq kisianni takujuminaatsippara maannakkornit pitsaanerungaalersinnaasoq, borgmesteri oqarpoq.

Taassuma oqarnera naapertorlugu kiffartuussinermut isumaqatigiissusiornikkut angallanneqartarnissaq qulakkeerneqarumaarpoq.

Sukkut aqquserniortoqassanersoq, qanoq akeqarlunilu isorartutigissanersoq suli ilisimaneqanngilaq. Misissueqqaarnerilli ukioq manna aallartissasut borgmesteri oqarpoq.

- Aaqqissuussaasumik, torersumik, taavalu sukkut aqquserniortoqarsinnaanera taanna misissorluarneqassasoq, Lars Erik Gabrielsen oqarpoq.

Akileraarnerusoqarsinnaasoq

Qeqertamit Ikerasammut silaannakkut isorartussusaa kilometerit 40-it missaanniippoq.

Suliniut qanoq aningaasalersorneqassanersoq borgmesterip maannakkut akisinnaanngilaa. Aningaasaleeqataasinnaasunilli ujartuerusuppoq. Nunap karsiata aningaasaleeqataanissaa neriuutigaa. Avannaatali Kommuniani akileraartartut aamma akileraarnerullutik aningaasaliisinnaanerat ammaffigaa.

- Procentip ataatsimik qaffanneratigut immaqa ingerlanneqarsinnaasoq, Avannaata Kommuniani borgmesteri oqarpoq.

Taassuma aalajangersinnaaguniuk aqqusiniliorneq ukiup tulliani aallartinneqassaaq.