Avannaata Kommunia: Siumut Nalerarlu suleqatigiittussanngortut

Kommunalbestyrelse inissittoq siulleq avammut nalunaarutaavoq. Siumut Nalerarlu Avannaata Kommuniani suleqatigiinnissamut isumaqatigiillutik atsioqatigeeqqammerput.

Tamanna suleqatigiilersussat Facebookkimi toqqaannartumik aallakaatitsillutik takutippaat.

Siumumeersoq Lars-Erik Gabrielsen, Avannaata Kommuniani borgmesterinngortussanngorpoq.

- Atsioqatigiippugut nunaqavissut kalaaleqatigullu assut isiginiarlutigit. Aamma kalaaliunerput kannguginagu kisiannili aamma kalaallit ersarinnerullutik peqataasariaqarnerat isumaqatigiissummi naqitanngorlugu suliarineqarnikuuvoq.

- Aamma assortuussuteqarsimanngilagut isumaqatigiinniarnitsinni. Pitsaasorujussuarmik ingerlanikuuvoq. Taamaammat isumalluarpugut suleqatigiinnissatsinnut assorujuk, Lars-Erik Gabrielsen atsioqatigiinnermi oqarpoq.

Napaattooq borgmesterip tulliatut siullinngortoq

Jens Napaattooq borgmesterip tulliatut siullinngortoq, suleqatigiilersut saqqummiuppaat.

Taassuma Siumup naaperiutai pitsaasutut atsioqatigiinnermi nalilerpai.

- Neqeroorutaat uatsinnut itigartissallugit ajornarsimaqaat. Nalorninata isumaqatigiinnermut peqataavugut, Jens Napaattooq, oqarasuaatikkut peqataasoq oqarpoq.

Suleqatigiilersut ataatsimiititaliamik nutaamik pilersitsissasut, atsioqatigiilluni saqqummiussinermi oqaatigineqarpoq. Tassa takornariaqarnermut ataatsimiititaliaq nutaatut pilersinneqassaaq.

Siumut Nalerarlu Avannaata Kommuniani inissani 17-ini qulinik issiaveqassapput.

Avannaata Kommuniani kommunalbestyrelsissaq qaqugu inissilluni ataatsimeeqqaassanersoq suli avammut nalunaarutigineqanngilaq.