Naalakkersuisuusimasoq KNR-imi pisortanngortoq
Hans Peter Poulsen tusagassiorfimmi KNR-imi pisortanngorpoq.
Taassuma Annga Lyngep soraarsinneqarneraniilli pisortaagallarsimasoq, Bjørk Lange Olsen taarserpaa.
Hans Peter Poulsenip tusagassiorfik piffissami kingullermi sulisussaaleqingaatsiartoq atorfigilertussaavaa. Sulisussaaleqineq nutaarsiassaqartitsivimmi sulisut sulinerminnik unitsitsinerisa kignunerisaanik sulisut sisamat marsip arfineq-aappaani soraarsinneqarmata annertunerulerpoq.
Imaq sikorasaaraluartoq sukkatsisimaarluta ingerlaqqilissaagut
Naallu tusagassiorfik ilungersunartorsioraluartoq, siulersuisut siulittaasuat, Nukaaraq Eugenius pisortassamik nutaamik toqqaaneq neriuuteqarfigilluarpaa.
- KNR-imi piffissami matumani inuiaqatigiinnut kalaallinut nutaarsiassanik allatigullu tusagassiisarneq ilungersunartorsiorfiuvoq. Taamaattoqarneranilu pisariaqavippoq pisortamik angusaqarluarusuttumik patajaatsumillu siuttoqarnissarput.
- Hans Peter Poulsen qullersanngornissaminut piareersimavoq, apriililu naappat KNR-imi pisortap allaffianut isertersinnaassalluni, Nukaaraq Eugenius tusagassiuutinut nalunaarummi allappoq.
Hans Peter Poulsen ukiuni kingullerni Múte B. Egedep naalakkersuisunut siulittaasuunerani 2023-miit ineqarnermut attaveqaasersuutinullu naalakkersuisuuvoq.
Maannali nutaanik naalakkersuisoqalersimalerpoq, Hans Peter Poulsenilu KNR-imi maajip aallaqqaataanit atorfinissalluni.
- KNR-imi ingerlanitta patajaallisaqqinneqarnissaa inuiaqatigiit kalaallit pisariaqartippaat, aammalu malugaarput Naalakkersuisunngortut ingerlalluaqqilernissatsinnut ikorfartuinissaminnut piareersimasut.
- Neriulluarpugut Hans Peter Poulsen pisortatut aquttoralutigu "imaq sikorasaaraluartoq" sukkatsisimaarluta ingerlaqqilersinnaassalluta, Nukaaraq Eugeneus tusagassiuutinut nalunaarummi oqarpoq.
