Mette Frederiksen Folketingimi: Kalaallit Nunaata siunissaminik nammineq aalajangiisinnaatitaanera kialluunniit assortorsinnaanngilaa

Kalaallit Nunaata namminiussuseqarnera namminerlu aalajangiisinnaatitaanera allanngortinneqarsinnaanngilaq. ‘Kalaallit Nunaat’. Kalaallit pigaat', taanna oqaluttarfimmit oqarpoq.

Allattoq Isak Hüllert

oktobarip 06-at 2026 12:04

Nutserisoq Medea Olsen, Ivalu Thorleifsen

Danskit ministeriunerata, Mette Frederiksenip, Folketingimi ammaanersiorluni oqalugiaammini, Kalaallit Nunaata siunissaminik nammineq aalajangiisinnaatitaanera naqissuserpaa.

Ministeriunerup kalaallit oqalugiaammini toqqaannartumik saaffigai, illersornissarlu pillugu USA-mik isumaqatigiissuteqarneq maluginiaqqullugu.

- Naalakkersuisut siulittaasuata oqarneratut, Kalaallit Nunaat pillugu isumaqatigiissutaanngilaq, Kalaallit Nunaannulli isumaqatigiissutaalluni, Mette Frederiksen oqarpoq.

Taassuma oqarneratut, isumaqatigiissutaavoq Kunngeqarfiup killinganik namminiussuseqarneranillu ataqqinnittoq Kalaallit Nunaatalu siunissaminik nammineerluni aalajangiisinnaatitaaneranik naqissusiisoq.

Mette Frederiksenillu oqaatsini naqissuserumallugit kalaallit nunaminnut namminneq taaguutaat atorlugu allaat erseqqissaavoq:

- Nunassinnut namminneq taaguutersi tulluarnerpaajuvoq, taanna oqarpoq nangillunilu:

- Kalaallit Nunaat. Kalaallit pigaat.

Nunatsinni suleqatini nersualaarpaa

Ministeriunerup naalakkersuisut siulittaasuata Jens-Frederik Nielsenip USA-mik isumaqatiginninniarnerni pissanganartuni sulisimanera pillugu nersortorujussuuaa.

‘Isumatusaartutut, siunissami pisussanut isiginnissinnaasutut pikkorissutullu’ taagorpaa, qanimullu suleqatigiissimanertik pillugu ‘pikkorinaarpaa qujamasullunilu’.

Mette Frederiksenip atorfilittat amerlasuut, Illersornissaqarfik politiillu, nunatsinni pissutsinut isumaginnissimammata qujaffigai.

Danmarkip nunattalu ‘tunngaviusut pingaarnerit’ attatiinnarlugit USA-p isumaqatigiissuteqarfigineqarsimanera erseqqissarpaa.

- Isumaqatigiissut Issittumi Atlantikullu avannaani isumannaannerulersitsisoq. Kunngeqarfimmik NATO-millu qajannaannerulersitsisoq, oqarpoq.

Ministeriunerup Danmarkip nunattalu suleqatigiinnerat arlalitsigut ingerlaannassasoq aamma oqaatigaa.

Tamanna peqqinnissaqarfik, ineqarneq, attaveqaasersuutit, inuussutissarsiornikkut ineriartorneq, sakkutooqarnerulersitsineq upalungaarsimanerlu ilaatigut pineqarput.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.