Assammik arsarneq: Ukiut 15-it tulleriisillugit pissartanngoreernermi qaarsillattoqarpasinngilaq
Assammik arsartartut peqatigiiffiat GSS ukiut tulleriisillugit pissartaasarnermi arnani angutinilu pissartaasaqattaartuarsinnarpoq.
Rekordiat nutaaq tassaavoq pissartaanerit 15-it tulleriisillugit. Tamanna inissippoq sapaammi unnukkut Ilulissat assammik arsarnermi pissartanngorniunneq naammassimmat. Tassani GSSip arnartai illoqarfeqatiminnut NÛK-mut finalemi 31-19-mik ajugaapput.
Immaqa isumaqartoqarsinnaagaluarpoq tulleriisillugit pissartanngornerit taama amerlatigilerneranni qaarsillattoqarsimassasoq. Anførialli Andrea Heilmann naapertorlugu taamaappasinngilaq.
- Taamatut eqqarsarneq ajorpugut. Sungiusarneq nutaaq aallartikkaangat immitsinnut nutaanik anguniagassittuaannarpugut taamaasilluta immitsinut ’perlilertittarluta’, Andrea Heilmann KNR-mut oqarpoq.
Iluarsilaartuarpoq
Taamatuttaaq sungiusaasuat eqqarsartarpoq. Team time out atorlugu minutsimi ataatsimi unikkallarnermi arsariaatsimik iluarseeqqusiuartarpoq apeqqutaatinnagu isertitat qanoq inissisimanersut. Iligiit tamarmik immikkoortumi ataatsimi marloriarlutik team time out atorlugu minutsi oqaloqatigiissinnaapput.
- Unamminitsinni niaqora sulisittuaannarpara unammisavut qanoq iliornersut maluginiartarlugu. Eqqarsaatigilaartuaannarpara saassussinermi unammisatta assersuisui qanoq ammariarsinnaanerlugit, GSS-mi arnani sungiusaasoq Kim Ostermann Petersen KNR-mut oqarpoq.
Aasaanerani sulinngiffeqareerrnermi maannalu pissartanngorniutereernermi nutaanik anguniagassinneq aallartittarpoq.
- Pissartanngorniutereernermi timerput qanoq innersoq takoqqaalaartarput. Tamatumali kinguninngua sungiusaqqilersarpugut ilaatigut inuusuttuaqqanik ilalersorluta, Andrea Heilmann oqaluttuarpoq.
Allaniit pitsaanerungaatsiarput
Aallartiaartarluni periuseq aamma GSS-ip angutitaasa atugarivaat, taakkulu ukiut 15-it tulleriisillugit aamma pissartanngorput. Finalemi GSS-ip angutitai Nagdlúnguamut Ilulisaaneersumut 37-27-mik ajugaapput.
- August septemberimili sungiusarluta aallartippugut tamatigorluinnangajallu 14-16-it missaanniittut takkuttarput. Soorunami ilaatigut angalasoqarsinnaasarpoq. Kisianni immitsinnut pitsanngoriartittuaannarsinnaavugut sungiusarnermi unammisaratta, GSS-mi arsaqataasoq Akutaaneq Kreutzmann oqarpoq.
- Assammik arsartarfimmi aamma nukkassarnermi sungiusartuaannarpugut. Tamanna pissutaagunarpoq allaniit pitsaanerungaatsiarnerunitsinnut, oqarpoq.
