Kommune Kujalleq ikioqqusoq: Naalakkersuisut kommuninut tamanut ikiuissapput

Suliassat amerlassusiisa sulianillu isumaginnittut akornanni naligiinnginneq annertungaarmat Nunatsinni kommunit tamarmik nunanit allanit siunnersortinit atorfinitsitsisariaqarput. Aaqqiissut nuna tamakkerlugu suliniutaasoq, Stine Egede isumaqarpoq.

Allattoq Kim Hinrichsen, Jaaku Lyberth

decembarip 11-at 2024 07:33

Kommune Kujallermi borgmesterip, Stine Egedep isumaginnittoqarfimmut akisussaaffik naalakkersuisunut tunniunneqartoq novembarip arfineq-pingajuanni nalunaarutigimmagu tamanna kikkunnut tamanut uissuumminarpoq.

Kommunimi borgmesterilu sumut atorneqassappat?

Aamma atuaruk Stine Egede: Aningaasaqarneq tukattoq nangippara

Borgmesterip nammineq oqarnera naapertorlugu isumaginnittoqarfimmi suliassaqarfiuallaartumi sulisussat naammannginneranni akisussaassuseqartumik qisuariaatissani tamanna kisimiippoq:

- Meeqqat pillugit suliassat 800-t sinneqarput, isumaginninnermut aamma innarluutilinnut tunngasuni suliassat 1000-t sinneqarput, taakkunanilu pinartut 500-t sinneqarlutik. Taamaammat utaqqisinnaannginnami saaffiginnippunga.

- Taamaammat utaqqisinnaannginnami saaffiginnippunga, taannalu naalakkersuisuninngaanniit sivisulaamik suliarineqareerluni novemberip 20-ani naalakkersuisut aalajangiiffigaat, ikiorsiinissaq pisariaqartoq.

Ajoraluartoq taamaaliornissarli pisariaqartoq

Naalakkersuisut ikiuineranni Kommune Kujallermit isumaginnittoqarfik tamarmi tiguneqarpoq.

Borgmesterilli akisussaaffimmik tigusiffiusup oqarnera naapertorlugu ilungersunartut aaqqiissuteqarfiginissaannut akisussaaffik tunniunneqarani allamik aqqutissaqanngilaq:

- Inatsimmik allamik tunngavissaqannginnamik, suspensionslov atortariaqarsimavaa, taanna oqarpoq, nangillunilu:

- Kisianni inatsit allanngortinneqartinnagu kommunit ikiorserneqarsinnaanngillat, taamaattumik januar uanga utaqqinianngilara, kommunimi suliassat amerlavallaaqimmata.

Kujallermi missingersuutit

Kommunalbestyrelsip kommunip 2025-mut missingersuutai novembarip 28-ani akuerai.

Kommunip ingerlatsinermut sanaartornermullu 663 millionit missingersuutigai.

Akileraartarnermut procenti allanngortinnerani 27 procentiuinnassaaq.

Katillugit 20 millioninik sipaarniarnissaq pisariaqarsimavoq.

2024-mut missingersuutinut sanilliullugu piffissami matumani 33 millionit koruuninik qaangerneqarput - piffissamilu matumani aningaasat tigoriaannaat 19 millionit atorneqarlutik.

Allisiguk

Stine Egedep oqarnera naapertorlugu isumaginnittoqarfimmi suliassat – pingaartumik meeqqanut susassaqarfimmi amerliartornerat ajornartorsiutaanerpaavoq.

Nunatsinnilu sulianik isumaginnittussat naammannginnerat pissutigalugu Danmarkimut pissarsiortoqartariaqarpoq:

- Ukiuni kingullerni annertoorujussuarnik meeqqanut suliassanik eqqarsaatigalugit, allaninngaanniit ikiortissarsiortariaqarsimavugut, pissutigalugu suliassat amerlammata, sulisussaaleqiuarlutalu. Sulisussanik avataanersunik amerlalaartorsuarnik pissarsinitta kingunerisaanik, suliassat annertuut, suliarineqalerput.

- Taassuma saniatigut meeqqat angerlarsimaffiup avataanut inissinneqartariaqartut, amerlatserujussuarsimapput. Taamaattumik tamanna aningaasartuutinut annertumik atuinitsinnut nipilersoqataavoq.

Suliassarpassuaqarnera ilisimaneqarluartoq

Isumaginnittoqarfimmi sulianik isumaginninnermi suliassat ajornaatsuunnginnerat nutaarsiassaanngilaq.

Tamanna KNR-imit aamma arlaleriarluta allaaseraarput.

OMBUDSMANDIP MISISSUINERA

Ombudsmandi kommunit meeqqanik inissiisarneq angerlartitsisarnerlu pillugit suliaanik misissuivoq.

Ombudsmandi misissuinerminut tunngavilersuummini ima allappoq: "Kommunit meeqqanik inissiisarneq angerlartitsisarnerlu pillugit suliaannik arlaleriarlunga misissuisareerpunga. Misissusarninnilu paasisakka kommunit tamatumani suleriaasiannik isornartorsiuininnut tunngaviukkajupput."

Ombudsmandenip misissuiffigisassatut taamungaannaq toqqagai tassaapput Kommune Kujalleq aamma Qeqqata Kommunia. Sulianillu arlalinnik misissoqqissaagassaminik kommunit taakkua marluk toqqaaqquai.

Tassa kommunit taakkua sulianik misissugassaminik qulinik meeqqanik 2020-p 2021-llu inissiinermut tunngasunik taavalu sulianik allanik aamma qulinik meeqqanik 2020-p 2021-llu akornanni angerlatitsinermut tunngasunik toqqaaqquai.

Suliat misissugassatut toqqakkat katillutik 30-upput.

Kommune Kujalleq aamma Qeqqata Kommunia suliat misissugassatut toqqakkatik pillugit Ombudsmandip nalunaarutaanut missingiummut oqaaseqaateqarnissamik periarfissinneqarsimappput.

Allisiguk

Stine Egedellu oqarnera naapertorlugu tamanna kommunimi qangali aamma paasineqarpoq – taamaammat naalakkersuisunit ikiorneqarnissaq sivisuumik kissaatigineqarpoq:

- Nuna tamakkerlugu isumaginninnermut tunngasuni sulisunik amigaateqartoqarpoq. Uagut allaanerunngilagut, qinigaaffik aallartimmalli, naalakkersuisunut saaffiginnittaraluarpugut, kisianni tamanna iluatsinngilaq.

- Taamaattumik kommune nammineerluni Danmarkimut, ekstern konsulentinik ikiortissarsiorpoq, tamannalu kommunimut ukiut taakku pingasut ingerlaneranni 20 millionit koruunit tikillugit akeqarpoq, taakkua akisoorujussuusimapput kisianni pisariaqaavissimapput.

Nunatsinnut tamarmut ikiuineq

Stine Egedep oqarnera naapertorlugu ajornartorsiutaasoq naaffeqanngilaq. Nunatsinnimi kommunit allat aamma taama ilungersuuteqarput.

Taamaammat naalakkersuisut nunatsinnut tamarmut ikiuisariaqartut aamma isumaqarpoq.

Kommuninit tamanit akisussaaffimmik tigusissanersut Stine Egedep akissuteqarfigaa. Kisianni arlaatigut iliuuseqartariaqarpoq:

- Aningaasaqarnerput paasigatsigu qanoq innersoq, aalajangertariaqarsimavugut konsulentit akisoorujussuit unitsittariaqarlugit.

- Naalakkersuisunut siunnersuuteqarpunga nuna tamakkerlugu isumaginninnermut tunngasunut iliuuseqartoqartariaqartoq.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.