Stine Egede: Aningaasaqarneq tukattoq nangippara

Kommune Kujalliup 2025-mut missingersuutit novembarip 28-ani saqqummiuppai.

Kommunimiillu missingersuutit kingulliit assigalugit amigartooruteqarnerujussuup unitsinnissaanut ukioq manna aamma sipaarniangaatsiartoqarpoq.

Tamatumuuna 20 millionit koruunit sipaarutigineqassapput.

Taamaakkaluartorli borgmesterip missingersuut kommunalbestyrelsimit akuerineqaqqammersoq nuannaarutigaa.

-  Naammagivakka, soorunalimi pitsaanerujussuusinnaagaluarput,  piffimmi killiffipput aallaavigalugu, pitsaanerpaasinnaasoq tassa saqqummiupparput.

Borgmesterip qaartartuutaa

Kommune Kujallermi immikkut ittumik inissisimavoq.

Aningaasaqarnermut ataatsimiititaliap Namminersorlutik Oqartussanut qaammatini pingasuni akileraartoqarsimanngitsoq apriilimi paasivaa. Aningaasat taakku 40 millionit koruunit missaannik annertussuseqalersimapput.

- Iluatsilersutut isikkoqartikkaluarparput upernaaq tikillugu, ilisimatinneqartuartaratta ernumanartoqanngitsoq, apriilimi qaartartoq qaarpoq, Stine Egede oqarpoq, nangillunilu:

- Misissuinermi paasinarsimavoq, 2019-mi kommune akileraarutinut akiliinngitsoorsimavoq,  aamma 2022-mi akileraarutinut akiliinngitsoorsimavoq.

Naallu tamanna ilungersunareertigisoq akileraarutinut akiliinngitsoornerit ilungersunartut ilaminiinnaraat, kommunimmi aningaasaqarnera ilungersunartorsiorfiuneruvoq:

- 2021-mi aallartikkatta, ingerlaannarluta paasivarput 37 millioner koruuninik amigartuussasugut, arlaatigut iliuuseqanngikkutta. 2021-mi budgetilerikka siullermeerluta, 2022-mi atuuttussanik, tassani 30 million koruuninik nassaartariaqarsimavugut, Stine Egede oqarpoq.

Ernumassuteqarnermi allakkat

Stine Egede 2021-mi kommunimut qinersisoqarnerata kingorna borgmesterinngorami aningaasaqarnermik tukattumik torersaanissani neriorsuutigigaluarpaa.

Tamannali iluatsinngilaq. Tamanna borgmesterip nammineq aamma nalilerpaa:

- Taanna nassuerutigisariarpoq. Ukioq ataaseq maanna sinnerlugu, allaninngaanniit ikiortissarsiorluta aallartippugut, aningaasaqarnermik suliffeqarfinnit  misissuinerit aallartinnikuuarput. Misissuinermi tassani paasinarsimavoq, 2019-mi kommune skatimut akiliinngitsoorsimavoq,  aamma 2022-mi skatimut akiliinngitsoorsimavoq.

Egedelli oqarnera naapertorlugu ajornartorsiutit tamanna sioqqutingaatsiarluguli aallartippoq:

- Allakkianik nassaarpugut, 2020-mili, qinigaaffik sioqqulluguli, naalakkersuisoqarfimmit allakkanik ernummatinik Kommune Kujallermut nassitsisoqarsimavoq, allakkat taakkua aatsaat qanittukkut paasivagut.

Ilungersunartut nangikkai

Stine Egedep oqarnera naapertorlugu ajornartorsiutit amerlanerpaartaat borgmesterinngunngikkallaramili ajornartorsiutaapput.

 - Allakkiat aatsaannguaq eqqaasakka, ilisimasimagaluarutsigit, allatorujussuaq aallartikkattali ingerlariaqqissimassagaluarpugut.

Naallu Stine Egede kommunalbestyrelsimi 2013-imili ilaasortaagaluarluni borgmesterit siuliisa ingerlatsinerani taama ajortigisumik inissisimasoqarnera ilisimasimanngilaa:

- Ajoraluartumik kommunitsinnut ajornartorsiutaasimavoq, ukiorpassuarni immaqa, kulturi taanna allanngortinniarlugu ilungersorpugut, ilisimatitsissutissat politikerinut apuunneqartanngitsut, taanna ajornartorsiutaasimavoq annertoorujussuaq.

Naalli aningaasaqarneq suli iluarsineqanngikkaluartoq Stine Egede ukiuni sisamani borgmesterioqqikkusuppoq, taamaammallu apriilimi qinersisoqaqqilerpat qinigassanngortissaaq:

- Qinigassanngorteqqissaanga, isumaqarpunga suliassaq suli naammassinngitsoq, torersaassineq aatsaat aallarteruttorpoq, kommunip aningaasaqarneranut killiffipput imaannaanngitsoq, aatsaat massakkut torersaassinitsinni alloriarfissanngortinneqalerpoq pitsaasumik.