Nutaarsiassaqartitsivik: Aningaasaqarnikkut uiverneq meeqqallu pillugit suliani kukkuneq – Kommuni isornartorsiorneqangaatsiartoq
Kommune Kujalleq 40 millionit koruuninik akileraarutinut akiitsoqarluni akiliinissaminik ilaginnaaginnarnera KNR-imit allaaserineqareernikuuvoq.
Kommunili tamatuma saniatigut 70 millioner koruuningajalluinnarnik amigartooruteqartoq – ajornartorsiutillu tassunga uninngitsut, tusagassiorfik TV2 maanna allappoq
Kommunimi aningaasat qanoq amerlatigisut atorneqarsinnaanerinut, qanorlu atuitigisimanermut, 2021-miillu qanoq amerlatigisunik taarsigassaqalersimanerluni ataatsimut tamakkiisumik takussutissaateqanngilaq.
TV2 kommunip aningaasaqarneranut saqqummiussiniarluni misissuingaatsiarsimavoq – allamullu inissiinerni isumaginninnermull tunngasuni suliani kukkusanik amerlasuunik saqqummiussipputtaaq.
Assingusumik takusaqanngisaannarsimasoq
2023-mi naatsorsuutit ukioq manna marsimi aatsaat saqqummiunneqarput. Kukkunersiuisorlu tassani 20-nik isornartorsiuivoq.
Kukkunersiuisup kommunimi aningaasaqarneranik aqutsinerup tamaanillu isiginnissinnaanerup amigarneranik paasinninnerata saniatigut sulisut akornutissaqanngitsumik imminnut akissarsitissinnaasimasut TV2-p oqaatigaa.
Aammattaaq sulisut 194-it aningaasarsiassarinngisaminnik 2023-mili ataatsimoorlutik 2,7 millionit koruuninik pissarsisimanerannik kinguneqarpoq. Taakkunannga 84-it aningaasassarsiarinngisatik utertissimanngilaat.
Tamakku pissutigalugu Aalborg Universitetimi aningaasaqarnermik aqutsinermik professorip, Per Nikolaj Bukhip kommune sammiveqanngingajattumik aqunneqarsimanerarpaa:
- Oqaluttuarfigineqarsimanngikkaluaruma uangalu nammineq takusimanngikkaluarukku upperinavianngikkaluarpara. Paasinerluisimasutut oqaatigisimassagaluarpara, taanna TV2-mut oqarpoq.
Pinngitsaaliissummik inissiinermi kukkuluttornerujussuit
Kommune Kujalliup isumaginninnermik suliassaqarfik – pingaartumik meeqqanut inuusuttunullu suliassanut tunngasut nammineq aqussinnaanngikkai KNR-imit siusinnerusukkut allaanerineqarnikuuvoq.
2022-mili suliat amerlanerpaartaat kukkunertaqartut TV2-mit maanna saqqummiunneqarpoq. Meeqqanik angerlarsimaffiup avataani paarineqartussanngortitsinermi suliani arfineq-pingasunit arfineq-marluk kukkunertaqarput. Tamatuma saniatigut meeqqanik ulloq unnuarlu inissiisarfinnut inissiinermi suliat affaanni kukkusumik suliaqartoqarsimavoq, pisortaniillu ikiorsiissuteqarnermut sulianit 13-init aqqanilinni kukkusoqarsimalluni.
TV2-p saqqummiussaa naapertorlugu aningaasaqarnermut ataatsimiititaliap borgmesterimit siulittaasuuffigineqartup suliassani naammassisimanngikkai kukkunersiuisut inerniliissutigaat.
- Kukkusoqaraangat tamanna kommunalbestyrelsip akisussaaffigisarpaa. Taakku suliassanik naammassinnissinnaasunik atorfinitsitsinissaq pisussaaffigaat aamma suliassanik pingaaruteqartunik naammassinnittoqarnissaanik qulakkeerinnittussaapput. Taamaaliunngillallu, Per Nikolaj Bukh TV2-mut oqarpoq.
TV2-p borgmesteri, Stine Egede (IA) oqaaseqartinniarsarigaluarpaa. Taassumalu TV2-p saqqummiussiniarnera qineqqusaarnermut sunniiniartutut isigigamiuk suliaq oqaaseqarfigerusunngilaa. Tamanna allakkatigut akissummi oqaatigaa.
- Kalaallit qinersinerata nunani allani tusagassiorfinnit, matumani danskit tusagassiorfiinit sunniivigineqannginnissaa pingaaruteqarpoq, borgmesteri, Stine Egede TV2-mut oqarpoq.
