Naalakkersuisut CO2-mik aniatitsinissamut akueritinnissaq ilimagaat

Isumaqatigiinniarnissaq qanillisoq, Jens B. Frederiksenip uppernarsarpaa.

- Oqarsinnaavunga isumaqatigiinneq annertoorujussuusoq immaqalu ilimagisatsinnit annertunerujussuulluni. Ilimagisamit annertuneruneranut pissutaavoq, Nunatta naalagaaffeqatigiinnerup ataani inissisimanera pissutigalugu immikkut ittumik isumaqatigiissusiorfigineqassammat, Jens B. Frederiksen oqarpoq.

- Kingumut qiviarutta, Kyoto-milu isumaqatigiissut tunngavigalugu oqassagutta, taamaallaat uangut isumagisassaraarput naliginnaasumik CO2-mik aniatsitsinitsinnut appaanissarput. Ingerlatsivissuillu maani aniatsitsineri Qallunaat Nunaata akiligassaraat, Jens B. Frederiksen erseqqissaavoq.

Isumaqatigiissutissaq ilimagineqareersutut inissinneqarpat, Nunatsinni suliffissuit siuarsarnissaannut tamanna iluaqutaagaatsiartussaassaaq.

- Isumaqatigiissutissap iluaqutigaa, ingerlatsivissuit Nunatsinni aallartikkunik ernumassutigissanngimmassuk annertoorujussuarmik akiliisitaanissartik. Taamaatumillu ilimagineqarsinnaavoq aatsitassarsiorfissuit amerlanerit Nunatsinni aallartissinnaaneri, Nunatsinni silap pissusaanut attuumassuteqartunut akisussaasoq, Jens B. Frederiksen taama oqarpoq.

Taassuma naatsorsuutigaa silap pissusaanut tunngasunut isumaqatigiissut nutaaq aasap ingerlanerani akuerineqarumaartoq.

Nunatsinni ingerlatsivissuit aatsitassarsiorfissuillu aallartippata, taakku CO2-mik akeqanngitsumik aniatsitsisinnaanerat Nunatsinni oqallinnerni assortuussutaasut tassa maanna akissutissarsineqalerunarput.