Kalaallit Nunaata sineriaa 22.000 km2-itut annertutigisoq qaammataasat atorlugit nunap assiliorneqartoq

Geodatastyrelsip piareersaatitut suliniummut nutaamut atatillugu, Kalaallit Nunaanni sinerissap qanittuani imartat, Nuup-Maniitsullu akornanni, Tasiilap Ittoqqortoormiillu eqqaanni, 22.000 km2- isut annertutigisoq immap assiliorsimavaa. Paasissutissat maanna tamanit takuneqarsinnaanngorput saqqummiisarfik NunaGIS aqqutigalugu.

Allattoq Irene Jeppson

septembarip 01-at 2025 15:09

Nutserisoq Karla Heilmann

Piareersaatitut suliniutip siullermik pingaarnertut siunertaraa teknologiip misilittarnissaa. Imaani angallannerup isumannaallisarneqarnissaa, annaassiniarnissamut upalungaarsimaneq aamma Kalaallit Nunaanni imarsiornermi atortulersuuteqarneq siunissami immamik assiliornerup annertusassagaa, Geodatastyrelsi tussagassiutinut nalunaarummi paasissutissiivoq.

Geodatastyrelsi piareersaateqarluni suliniummi inernerit atuisunut susassaqartunut suleqatinullu saqqummiunneqarnissaannut septembarimi Nuummi Tasiilamilu ataatsimiisitsiniartoq, Geodatastyrelsi aamma paasissutissiivoq.

Ilaatigut Asiaq qanittumik suleqatigineqarpoq, paasissutissat NunaGIS-ip saqqummiisarfiatigut aamma Geodatastyrelsip nittartagaatigut saqqummiunneqartarnissaat siunertaralugu.

- Piareersaasiorluni suliniummi matumuuna, Kalaallit Nunaanni sinerissap qanittuani imaani angalasunut isumannaallisaaneq annertusarniarlugu pingaarutilimmik alloriarpugut. Immap assiliornerup najukkami atuisut paasissutissanik, siornatigut pineqarsinnaanngitsunik tunivai, peqatigitillugulu suleqqinnissami pingaarutilimmik tunngavissiilluni, taama chefkonsulent Christian Thellufsen, Geodatastyrelsimeersoq oqarpoq.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.