Gazami innuttaasut nuunneqassasut illoqarfimmillu pingaarnersamik nutaamik pilersitsisoqassasoq, pilersaarusiami isertortumit kalerriunneqartoq
Gazap sanaqqinneqarnissaanut tunngatillugu Det Hvide Husimiit pilersaarusiaq isertortoq kalerriunneqarsimasoq naapertorlugu, Palæstinami sumiiffik niuerfittut qitiusunngortinniarneqarpoq, ilaatigut USA-miit aqunneqartussaq.
Pilersaarusiami titartagaq, aviisimiit Washington Post-imiit saqqummiunneqarsimasumi, siunissami Gaza portusuunik illorsualik, narsaatilik, qimuttuitsunut aqqutilik nutaanillu aqqusinilersugaq, takuneqarsinnaavoq.
Pilersaarusiaq naapertorlugu, innuttaasut 2 millionit utaqqiisaasumik inissinneqarallarnissaat, Gazap sanaqqinneqarnissaata malitsigissavaa - nunani allani imaluunniit Gazami sumiiffinni killilersukkani.
Inuit kattuffimmiit Gaza Humanitarian Foundationimeersut pilersaarusiamik suliaqartuupput. Taakku maajimili ikiuiniarlutik Gazami agguaapput.
Katuffik USA-miit Israelimiillu tapersersorneqarpoq.
Gaza USA-miit aqunneqalernissaa, kangia qiterlermilu akimarpaluttumik sissaqarfinngortinneqarnissaa, USA-p præsidentiata Donald Trumpip siornatigut oqaatigereernikuuaa. Trumpip takorluugaa pilersaarummi isertortumi kalerriutigineqartumit piviusunngortinniarneqarpasilerpoq.
Pilersaarutip qulequtaraa "Gaza Reconstitution, Economic Acceleration and Transformation Trust" - nutserlugu: Gazap sanaqqinneqarnissaanut aningaasarsiornikkullu siuariartornissaanut allanngornissaanullu ingerlatsivik.
/ritzau/
