Palæstinami inunnut ikiuiniarluni tusarnaartitsinermi 12.500 koruuninit amerlanerulaartut katersorneqartut

Gazami inuit ikiorniarlugit Nuummi ippassaq tusarnaartitsisoqarpoq. Tusarnaartitsineq iluatsilluartoq, aaqqissuisoq, Afred Hansen, Aalifammik ilisimaneqarnerusoq oqarpoq.

- Assorujussuaq ingerlalluaqaaq. Aallartinneranit naanissaata tungaanut inoqarluaqaaq, Aalifak oqarpoq.

Taanna inunnut maanna sorsuffimmiittumut Gazamiittunut Palæstinallu sinneraniittunut ikiuerusulluni, Nuummi Illorpumi tusarnaartitsinermik aaqqissuisuuvoq.

Taassuma saniatigut, tusarnaartitsineq nipilersortartunit eqqumiiitsuliortuniillu René Brandtimit, Miké Thomsenimit, Maali Hermansenimit, Nina Kreutzmann Jørgensenimit, ALFA-mit, Tûtumit, Pouli Willemit, Hansínguarmit, Fabrizio & Kristinemit, peqataaffigineqarpoq.

- Appisimaartut tamaavimmik tusarnersuaarlutillu attortinnarput, aaqqissuisoq oqarpoq.

Taassuma ilaatigut Tûtup Gazami inuit naalliunnerannut tungnasunik taalliorsimasup tusarnaartitsinera attortissutigaa.

- Meeqqat toqqissisimaffeqanngitsut toqorartullu pillugit taallani atoramagu, assut attortinnaqaaq, Aalifak oqarpoq.

Tusarnaartitsineq misigissutsinik aalassassimaarfiusoq

Aamma tusarnaariartut attortissimaqisut taanna oqaluttuarpoq.

Tusarnaartut aamma peqataalluarsimasut Aalifak oqaluttuarpoq.

- Nina Kreutzmann Jørgensenip "eqqissisinnga aat" atormagu tusarnaariartut tamaavimmik nikuillutik erinarsoqataapput.

Tusarnaartitsineq sukkasuumik aaqqissuunneqartoq, Aalifak oqaluttuarpoq.

Illorpumi tusarnaartitsisinnaanissartik aatsaat marlunngormat paasivaat. Taava tusarnaartitsinissartik atsaat sisamanngormat nittarsaatilerpaat. Taamaammat aaqqissuussisup tusarnaariartorpassuunissaat ilimaginngikkaluarpaa.

- Naamik taama sivikitsigisumik suliarineqartoq uanga ilimaginngikkaluarpara taama inoqartigissasoq.

Marlunngormat tusarnaartitsiffissaqalersut, sisamanngormat nittarsaassilersut sapaatiummallu tusarnaartitsisut

Tusarnaartitsinissamulli matut ammannginneranni, tusarnaariartut amerlanissaat ersereerpoq. Matut 16.30 ammannginneranni inuit aggialereertut, Aalifak oqaluttuarpoq.

- Tava sisamaninngaanniit paasingajalerlugu, okay takkuttoqarluassagunarpoq. Suli aallartinngilagut kisianni takkuttoqalereerpoq. Taava ingerlalluassagunarpoq, aningaaanillu katersilluassagunarluta, eqqumiitsuliortoq oqarpoq.

Inuit qassiunersut kisinngilai, kisianni Illorput ulikkaaqqasutut isikkoqartoq Aalifak oqarpoq. Innuttaasut illuata inersuaa inunnut 80-inut inissaqarpoq.

12.519,94 koruunit katersorneqartut, paasissutissiissutigaa. Tusarnaartitsinermi iluanaarutit tamakkerlugit aaqqissuussamut Læger uden Grænser-imut Palæstinamiittumut tunniunneqassapput 

Gazami sorsunneq oktobari 2023-mi aallartippoq, tassani Israel Hamas akiorniarsariniarlugu sakkortuumik sakkutuulersornikkut saassussinermik aallartitsimmata. Israelip Gazallu killeqarfiata akornanni Hamasimi sakkutuut killeqarfikkut saassussinerisa kingorna tamanna pivoq, Israelilu naaperorlugu inuit 1.200-t toqutaapput, taamaannerani inuit 250-it sallunaveeqqutitut tigusaineqarput.

Inunnik ikiuniarluni aaqqissuussaq Unicef naapertorlugu, Gazami inuit 60.900-t sinnerlugit toqutaapput. Toqutaasuni taakkunani ikinnerpaamik meeqqat 18.000-t toqutaapput. 

Gaza kaannersuaqarnerani inuit 514.000-t eqqorneqarsimanissaat nalilerneqarpoq. Tamanna FN-imit tapersersorneqartoq nakkutilliinermut immikkoortup IPC-mit, tallimangornermi nalunaarusiamiit paasivaa.