Nuummi katersuiniarlutik tusarnaartitsisut inuit Gazamiittut ikiussavaat
Nipilersortartut arfineq-pingasut – taakkua akornanni Nina Kreutzmann Jørgensen, Miké Thomsen aamma Tûtu – inuit Gazamiittut katersuiniullugit Nuummi Illorpumi sapaammi nipilersussapput.
Tusarnaartitsinermi iluanaarutit tamakkerlugit aaqqissuussamut Læger uden Grænser-imut Palæstinamiittumut tunniunneqassapput. Taamak tusarnaartitsinissamut aaqqissuisoq Alfred Hansen oqarpoq. Taassuma eqqummiitsuliortutut Aalifak-mik ateruseqarnini ilisimaneqaatigaa, tusarnaartitseqataassallunilu.
- Inuit taakkua minnerunngitsumillu meeqqat, Gazami Palæstinallu sinnerani naalliullutillu toqorartut misiginneqatigeqaakka. Inuiannik nungusaaneq, toqorartorpassuit, naalliunnerujussusarmut aserorterinerujussuarmullu isiginnittuulluni annernartorujussuuvoq. Taamaattumik tamattaalluta iliuuseqartariaqartugut misigisimangaatsiarpunga, taanna oqarpoq nangillunilu:
- Taamaammat inunnut Gazamiittunut ikiuiniarnermut toqqaannartumik tuttussanik aningaasanik katersuiniarpugut, nipilersornitsigut allanngueqataalluarsinnaallutalu inuup inuuneranik annaassisinnaavugut. Tamanna kusanarluinnartumik aaqqissuussinerusoq isumaqarpunga.
Alfred Hansen Palæstinami pissutsit pillugit EP-mik pingasunik erinarsuutitalimik siornatigut saqqumersitsinikuuvoq, iluanaarutillu Læger uden Grænserinut, inunnik ikiuinissamut aaqqissussamut nakorsamit ikiorasuarneqarnissamut tapersiisartuusunut inerlaqqittussanngornissaat aalajangiunnikuuaa.
- Læger uden Grænserit Gazamiittut Vestbreddenimiittullu nalunngilarput, taamaalilluta aningaasat inunnut Palæstinamiittunut toqqaannartumik tunniussinnaavagut, inuullu inuuneranik annaasseqataasinnaassalluta neriuutigaarput, taanna oqarpoq.
Allanngueqataasinnaavugut
Gazami sorsuttoqarneranut, Nuummi politikererpaalunnik peqataaffigineqartumik akerliussutsimik siornatigut takutitsisoqareerpoq. Taakku ilaanni naalakkersuisoq piffissami tassani Naalakkersuisunut siulittaasuusoq Múte B. Egede (IA) peqataavoq.
Alfred Hansen naapertorlugu, Israelimut Gazamilu sorsuttoqarneranut akuersaannginnerup ingerlatiinnarneqarnissaa pingaaruteqarpoq – tamannalu nipilersortoqarneratigut ilaatigut ikiuutaasinnaavoq.
- Tusarnaariat killitsisimaarnissaat, kisianni aamma nuannersumik misigisaqarfigissagaat neriuutigaara. Allanngueqataasinnaanermillu misigisaqassasut, naak Palæstina nunap sumiissusaanut ungasikkaluaqisoq, nipilersortartoq oqarpoq.
Katersuiniarluni tusarnaartitsineq ualimut nalunaaqutaq sisamanut aallartissaaq naammassissallunilu unnummut nalunaaqutaq arfineq-marlunut. Isilernermi qanoq akiliitigissanerluni nammineq aalajangerneqassaaq.
Gazami sorsunneq oktobari 2023-mi aallartippoq, tassani Israel Hamas akiorniarsariniarlugu sakkortuumik sakkutuulersornikkut saassussinermik aallartitsimmata. Israelip Gazallu killeqarfiata akornanni Hamasimi sakkutuut killeqarfikkut saassussinerisa kingorna tamanna pivoq, Israelilu naaperorlugu inuit 1.200-t toqutaapput, taamaannerani inuit 250-it sallunaveeqqutitut tigusaineqarput.
Inunnik ikiuniarluni aaqqissuussaq Unicef naapertorlugu, Gazami inuit 60.900-t sinnerlugit toqutaapput. Toqutaasuni taakkunani ikinnerpaamik meeqqat 18.000-t toqutaapput.
Gaza kaannersuaqarnerani inuit 514.000-t eqqorneqarsimanissaat nalilerneqarpoq. Tamanna FN-imit tapersersorneqartoq nakkutilliinermut immikkoortup IPC-mit, tallimangornermi nalunaarusiamiit paasivaa.
