- Ilinniarneq periarfissatsialaavoq!
Ilisimatusarfimmi igalaarsuarniit Sermitsiaq, qaqqaq ukialernerata apeqqaarneranit apummit qaallorissumit qallerneqareersimasoq, takuneqarsinnaavoq.
Ilisimatusarfiup iluani kialaartumi, ini niperpalaarpoq - tassa ilinniartut nutaat 206-it, isumalluaqalutik ilinnialerfissaminni aallartilerlutik katersuuteqqasut.
Ilai nuannaarpaseqalutik qungujulapput ikinngutitaatik eqisimaarrattut eqimattakkaaqatigilereersimallugit. Allat issiaviit tunorlernukarsimallutik nalornerpasinnerulaarlutik eqqartik isigaat.
Tamarmilli pissanngateqarlutillu annilaangalaarsinnaapput - nutaami aallartilernertik pillugu.
Takorluukkat annilaanngatillu ataatsimut
Oqaluttuassaq namminerminnut tunngasup nutaap aallartinera ilinniartut nutaanut atuuppoq - sungiusimasamiit ilisimanngisamut annertunerusumullu ikaarsaarneq. Siunissamut alloriarneq, ilisimatusarneq periarfissallu suli paasisaqarfiginngisaat, tassunga ammaassisuusussaallutik.
Rektorillu Gitte Adler Reimerip tikilluaqqusinermini tamatuminnga eqqaasippai: Ilinniarneq pisussaannartut isigisassaanngilaq.
- Ilinniaqqinnissamut periarfissaq suli periarfissatsialaavoq immikkuullarissoq, aamma ilissinnut. Tamanna nalussanngilarsi. Taamaalillusi taamaalillutalu maani nunatsinni immikkut pisinnaatitaaffigissaartorujussuuvugut. Taamaattumik aamma tamaviaassaasi - ilinniarnersi salliutissavarsi, ilinnnialerlaanut taanna oqarpoq.
Inuusuttut inersimasullu Kalaallit Nunaanneersut allaneersullu pissangarpasillutillu isumalluarpasipput - ilinniartutut inuunerup sumik nassataqarnissaa tamarmik immikkut takorluugaqarfigalugu. Taakku ilaagaat Willy Pedersen.
Willy Pedersen, 38-nik ukiulik Qaqortuminngaanneersoq najugaqarfik qimannagu ilinniartitsisunngorniarluni ilinnialerpoq.
- Kalaallit Nunaanni inunngorpunga inuunerali tamangajaat Danmarkimi najugaqarnikuullunga. Ukiut 30-t Danmarkimi najugaqarnikuuvunga ukiullu arfineq-pingasut Kalallit Nunaanni najugaqarnikuullunga.
- Arlalippassuariarlungali tamaaniittareerpunga. Angajoqqaakka mikisuullungali najorunnaarnikuupput ataatammali angalallunga tamaannarnissannut tuniuartarnikuuaanga. Taamaattumik aasaanerani sulinngiffeqarnerup nalaani ukiukkullu aamma, mikisuaraallutali arlaleriarluni feriartittarnikuuaatigut.
- Maanili ilaqutaqarama Kalaallit Nunaannut uternissara aalajangiuppara. Anaanaga ataatagalu Qaqortumi najugaqarput, piffissarlu sivisujunnaarluni, taamaammat ilaquttat najornissaat isumaqaqaaq. Qatanngutikka pingasut Danmarkimiipput taamaattumillu ilassiartorlugit piffissap ilaani feriartarnissara naatsorsuutigaara.
- Ilinniartitsisutut ilinniarsimalernissara takorluugaraara. Manna aqqutigalugu ilinniagaqarluarlunga ilinniarneralu nuannisaatigalugu. Qaqortumi ilinniartitsisoorusuppunga.
- Nunatsinniileqqilluni tupinnaqaaq. Aniiutaa imermik puilasumeersumik imertarsinnaaneq aalisariarsinnaanerlu. Mannami tupinnaqaaq, imaq, pinngortitaq silaannarlu. Nunarput nuannarinalernartunik tupinnartoqaqimmat uterfigerusunnartarpoq.
- Nuummi aatsaat najugaqalerpunga. Kollegiani najugaqarallarfissannik pivunga. Qaammat ataaseq affarlu attartornissaanut isumaqatigiissusiorfigineqarpunga, taamaattumik nuukkuma ingerlaannaq allamiit attartorneqalernissaa ilimanarpoq.
Ilinnialerlaat 206-it
Ilisimatusarfimmi ukioq manna ilinniartut 206-it ilinniartutut inuunertik aallartippaat.
Ilinniarfissani assigiinngitsuni aqqaneq-marluusuni immikkoortiteqqapput - tassannga ilinniartitsisunngorniarlutik ilinnialersimasut 51-iusut ilinniakkani aalajangersimasuni amerlanerpaartaralugit, tusagassiortunngorniarlutik ilinnialersimasut sisamaannaasut ilinniakkani ikinnersaralugit. Inuussutissarsiornermi aningaasaqarnermut ilisimatusarniarlutik 39-t ilinniartunngorput, peqqissaasunngorniarlutik ilinniartunngortut 14-iullutik kiisalu ilinniartut 17-it isumaginninnermut siunnersortitut ilinniagaqarniarlutik aallartillutik.
Kalaallit Nunaannilu ilisimatusarfituaq, inuusuttut inersimasullu nunatsinneersut katersuuffigaat.
Nuummut nuunneq arlalinnut allarluinnaavoq - ilaquttat sungiusimasallu qimanneri. Ukiullu tamaasa angerlarserneq peqqutigalugu ilinniakkamik uniitsitsiinnartoqartarpoq. Ullorli una, ilinniakkamik aallartiffimmi, ilinniartut tamarmik najuupput. Najuuttut neriuuteqarpasillutillu isumalluarpasipput.
Ilinniartullu nutaat akornaniipput ilinniartut 16-it nunanit allaneersut, tikeraarlutik ilinniariartut - ilaatigut Danmarkimeersut, Norgemeersut allaallumi ataaseq Japanimeersoq. Taakku tamarmik Kalaallit Nunaanni inuuneq ilinniartutullu inuuneq ilannguffigiumallugu Nuummut ilinniariarusussimapput.
Kristine Kruse, 24-nik ukiulik København-imeersoq, Inatsisilerituutut atuassaaq.
- Nuuk toqqarpara, ukiorpassuit matuma siorna tamaaneereernikuugama aammalu sumiiffik pinngortitamiiffiusinnaasoq illoqarfissuaanngitsoq ulapaarfiorujussuanngitsorlu tikeraarfigerusoqigakku. Taamaattumik maanngarusunnikuuvunga.
- Ataataga tamaani najugaqarnikuuvoq taamaattumik tamaanga siornatigut tikeraarnikuuvunga. Kalaallit Nunaat annerusumik ataffiginngilara ataffigilerusupparali.
- Bacheloritut naammassinissara takorloorpara taavalu - aap, inatsisilerinerup tungaatigut taanna nalorninalaarpoq toqqagassaqaqimmat - kisianni pillaasarnermut tunngatillugu inatsisilerineq soqutiginarteqaara, taamaattumillu maaniinninni pinerluttulerinermi inatsisit sammissavakka. Kalaallit Nunaanni tamakku samminissai pissanganaqaat isumaqarama allaanerujussuusut. Taakku tungaaniit isiginninneq paaserusuttorujussuuara.
- Ullumikkut annilaangalaarpunga naarlulaarlungalu. Tikeraarlutik ilinniariartut allat ullut kingulliit peqatigaakka, immitsinnullu ilinniarnerput nuannerpoq.
Ilinniakkat inuunermik ilusiliisut - nunamillu
Kiinarpassuit tamarmik immikkut oqaluttuassaqarput tamarmillu immikkut anguniagaqarput.
Ilinnialernerulli annerusumik ataatsimoorfimmut aamma tungassuteqarnera, ilinniartut nutaat rektorimiit eqqaasinneqarput.
Kalaallit Nunaat maannamut suli ilinniarsimasunik sulisussanik amigaateqarpoq - tamannarpiarlu pissutaalluni, ilinniartut naammassisaqarnissaat ilinniartunut ataasiakkaanut taamaallaat isumaqanngilaq.
Ilinniarnerup immini iluaqutaannaannginnera erseqqissarpaa - ilinniagaqarnerulli ilisimasaqalersitsiinnarnani inuunermi naleqartitanut aalajangeeqataasinnaasumik aamma sunniuteqarsinnaasoq.
- Ilinniagaqarneq inuttut ilissinnuinnaq kisimi iluaqutaanavianngilaq, ilinniagaqarneq immini iluaqutaammat. Ilinniarneq ilissinnut nuannersunik aamma malitseqassaaq, soorlu inuunermi nuannaarnerulernermik peqqinnerulernermillu, taanna oqarpoq.
Ilinniakkaminnillu naammassinnittartut amerlaneruppata, inuiaqatigiit iluaquserneqassapput.
- Amerlanerusut ilinniagaqarpata tamanna, ataatsimut isigalugu, inuiaqatigiinnut iluaqutaavoq. Inuit agguaqatigiisillugu ukioqqortussussaannut qaffassaataassaaq, innuttaasut aalajaannerulertarput - imaappoq, innuttaasut politikkikkut pimoorussillutik suliniarnerulissapput inuiaqatigiittullu ineriartortitseqataanissamut akisussaaffimmik tiguseqataarusunnerulissapput, Gitte Adler Reimer oqarpoq, ilinniakkamik aallartitsineq, inuttut nammineq inuunerup aqqutaani angalanermut nutaamut takussutissaannaanngimmat, Ilisimatusarfiulli kantiinaani neriuuteqartorpassuit takorluugaqartorpassuillu Kalaallit Nunaata siunissaanut attuumassuteqaqqissaarmata ilinniakkamillu aallartitsineq tamatuminnga aamma eqqaassutaammat.
