Uku arsaattartut Nunarput sinnerlugu Østrigimut Sloveniamullu unammissapput

Kalaallit arsaannermi nunanut allanut unammisartut Østrigip aamma Sloveniap akissarsiutiginagu nunanut allanut unammisartuinut oktoberimi unammissapput.

Nunat tamalaat arsaanneranni akissarsiutiginagu unammisartut immaqa suunngitsutut nipeqarsinnaagaluartut Nunatsinni nuna tamakkerlugu sungiusaasoq Morten Rutkjær suliassap imaannaanngissusaa pillugu qulanngivippoq. 

- Unammisassavut nunaminni pikkorinnerni nunanut allanut unammisartuunngillat kisianni pikkorinnerni unammisartunutn angummateqqajaasuupput. Nalilersinnaavakka taakku pikkorilluinnartuusutut, Nunarput sinnerlugu sungiusaasoq Morten Rutkjær KNR-mut oqarpoq.

Siusinnerusukkut saqqummiunneqareersutut Amerikap avannaani Caribiamilu arsaattartut kattuffissuanni Concacafimi ilaasortanngorniarnermi Nunarput itigartinneqarpoq. Nunatsinnili arsaattarnerup nunani allani soqutigineqarneranut tamanna killiliinngilaq.

- Qaaqqusissutit takkupput Concacafimiit itigartitaareersugut malugisinnaavarpullu kalaallit soqutigineqarnerat qaffariaqqittoq. Maanna unammiartortussanngornitsinni tamanna iluaannarpoq, Morten Rutkjær oqarpoq.

Inissat unammissutigaat

Kalaallit arsaattartut upernaaq unammiartornikuupput Silkeborg IFip Superligami paarlatsissamaataanut kiisalu Nordslesvigip unammisartuinut unammillutik.

Maanna Østrigip aamma Sloveniap akissarsiutiginagu unammisartui unammisussanngorpaat. Sungiusaasoq nassuiaavoq maanna unammiartortussatut toqqagaasut tassaanngitsut unammisassaminnut naleqqussakkat.

- Naagga, nunanut allanut unammisartutut immitsinnut aallaavigivugut aamma takutitsilluartartut maluginiarpagut kiisalu timersuumminnik arsaannermillu pingaartitsisut. Aamma Kalaallit Nunaanni pissartanngorniunnermi takutitsilluartut maluginiarpakka, Morten Rutkjær oqarpoq.

- Takusinnaasakka malillugit unammisartutta maannamut sakkortunersaasa ilagaat aammalu toqqagaaniulluni sakkortuumik unammisoqarluni. Massakkut naliliisinnaanera malillugu arsaattartut qulit 15-it maanna peqataanngitsut toqqakkanut ilaasinnaalluaraluarput, Morten Rutkjær oqarpoq.

Arsaannermi suli pisussaqarpoq. Septemberip naanerani  futsalimi Super Cupeqassaaq Nunatsinni pissartanngorniunnermi kakkannerit sisamat peqataaffigisaannik kiisalu futsalimi nunanut allanut unammisartut novemberimi Kroatialiartussaallutik.