Naalakkersuisoqatigiinnissamut isumaqatigiissut nutaaq aana

Partiinit tallimanit sisamat naalakkersuisuni nutaani ilaapput. Isumaqatigiissut suleqatigiinnissamut tunngaviliisoq ataatsimut uani paasisaqarfigiuk.

Allattoq Nicole Sander Bertelsen, Andreas Wille

marsip 28-at 2025 14:41

Nutserisoq Connie Fontain

Naalakkersuisoqatigiilersut naalakkersuisoqatigiinnissamullu isumaqatigiissut 20-nik qupperneqartoq innuttaasunut – nunarsuarmullu – ullumi saqqummiunneqarput.

Kikkut naalakkersuisunngornerat – aana ataatsimut isigalugu

Naalakkersuisut siulittaasuat, aamma Demokraatit siulittaasuat, Jens-Frederik Nielsen.

Aningaasaqarnermut akileraartarnermullu naalakkersuisoq, Múte B. Egede.

Nunanut allanut tunngasunut ilisimatusarnermullu naalakkersuisoq, Vivian Motzfeldt.

Ilinniartitaanermut, kultureqarnermut, timersornermut ilageeqarnermullu naalakkersuisoq, Nivi Olsen.

Inuutissarsiornermut, aatsitassanut, nukissiuutinut, inatsisit atuutsinneqarnerannut naligiissitaanermullu naalakkersuisoq, Naaja H. Nathanielsen.

Peqqissutsimut inuit innarluutillillu pillugit naalakkersuisoq, Anna Wangenheim.

Meeqqanut, inuusuttunut ilaqutariinnullu naalakkersuisoq, Mads Pedersen.

Aalisarnermut piniarnermullu nunalerinermut, imminut pilersornermut, avatangiisinullu naalakkersuisoq, Peter Borg.

Isumaginninnermut, suliffeqarnermut nunamullu namminermut naalakkersuisoq, Bentiaraq Ottosen.

Ineqarnermut attaveqaasersuutinullu isorliunerusunullu naalakkersuisoq, Aqqaluaq B. Egede.

Partiit Demokraatit, Inuit Ataqatigiit, Siumut Atassutillu ukiuni tulliuttuni sisamani suleqatigiinnisssaannut quppernerit 20-t tunngaviliipput.

Isumaqatigiissummi siullerpaatut ima allassimasoqarpoq:

- Ataatsimoorfigaarput nunarput. Aatsaat taama pisariaqartigilerpoq.

Aamma atuaruk Naalakkersuisoqatigiit pillugit annilaarnartoq: Isumaqatiginninniarnerit aallartittut – sunaluunniit mattunneqanngilaq

Isumaqatigiissut arlalinnik immikkoortortaqarpoq, ilaatigut namminiilivinnissaq, nunanut allanut politikki, aalisarnermut isumaqatigiissut allarpassuillu.

Tamatuma saniatigut naalakkersuisoqatigiilersut – Nunarput niueqatigiinnermut ammasoq – tuniniagaanngitsorli erseqqissaatigaat.

Isumaqatigiissummit toqqakkat ilaat aaku.

Namminiilivinnissaq

Paragraf 21 pillugu isumalioqatigiissitap nanginnissaa suliaminillu naammassinninnissaa naalakkersuisoqatigiit qulakkiissavaat. Kingorna Inatsisartuni partiit tamarmik isumaqatigiinniarnernut akuutinneqassapput.

Naalagaaffinngornissap sinaakkutaanik suliaqarneq kisiat suliarissallugu naammanngitsoq, naalakkersuisoqatigiilersut isumaqatigiipput. Piorsarsimassutsip naalagaaffinngoriartornermi piorsartuarnissaa isumaqatigiissusiortut pingaartippaat.

Aalisarneq

Naalakkersuisoqatigiit aalisarnerup inuiaqatigiinni piujuartinneqarnissaa aamma aalisarnerup inoqarfinni ataasiakkaani piujuarnissaa pingaartippaat. Isumaqatigiissummi Aningaasaqarnermut Siunnersuisoqatigiit naalakkersusioqatigiinnut siunnersuisarneratulli naalakkersuisunut aalisarneq pillugu siunnersuisartussanik aalisarnermut siunnersuisoqatigiinnik pilersitsissasut allassimavoq.

Angallanneq

Naalakkersuisoqatigiilersut Tasiilami Ittoqqortoormiinilu mittarfiliornerit qinigaaffimmi nutaami aallarteqqammersumi aallartinnissaat qulakkeerumavaat. Takornariaqarneq sumiiffimmilu pisariaqartitsineq eqqarsaatigalugit siunissami tikikkuminarnerulersitsisoqarnissaa pingaaruteqateqartoq taakku isumaqarput.

Peqqinnissaq

Naalakkersuisoqatigiit peqqinnissaqarfik pillugu isumaqatigiissut 2023-meersoq annertusineqassasoq siullertut allassimavoq. Peqqinnissaqarfik nukittooq inuiaqatigiinnut atugarissaartunut toqqammaviusoq partiit allappaat. Taamaammallu tamanna pingaaruteqarluinnartoq isumaqatigiissummi allappaat.

Aamma atuarukNunarput nutaanik naalakkersuisoqalersoq

Peqqinnissaqarfinni piginnaanilinnik sulisussaaleqineq ullumi ajornartorsiutini annerpaasoq partiit isumaqatigiissummi allappaat. Taamaammat sulilersitsisarneq sulisooreersunillu tamanik tigumminniinnarnissaq sulinermi qitiutinneqassapput.

Nunanut allanut, illersornissamut sillimaniarnermullu politikki

- Kalaallit Nunaat nunat killiit illersoqatigiiffianni ilaanera aalajangiusimassallugu pingaaruteqarpoq. Tamanna qularutissaanngilaq, isumaqatigiissummi allassimavoq.

Tamatuma saniatigut naalakkersuisoqatigiit nunanut allanut periusissiaq ”Kalaallit nunaat nunarsuarmi – pineqartilluta ilaassaagut” tunngaviatigut sulissutiginiarpaat.

Nunarsuarmili pissutsit nutaat pissutigalugit periusissiaq nutarterneqassaaq, taamaalilluni unammillernartut nutaat unammillernartuulertussallu pillugit piffissamut naleqqussarneqarsimassalluni.

Piffissami issittup nunarsuarmut pingaarutilittut inissisimanerani innuttaasut nunallu illersornissaat anguniarneqarpoq.

Isumaqatigiissutit tamaat naalakkersuisut nittartagaani atuarneqarsinnaavoq.

Aatsitassat

Naak aatsitassat pillugit oqaloqatigiinnerit oqallinnerillu amerlagaluartut tamanna pillugu naalakkersuisoqatigiinnissamut isumaqatigiissummi oqaaserpassuarnik ilaqanngilaq.

Aatsitassat ’nunatta siunissami aningaasaqarnissaanut pingaaruteqarluinnartunut ilaasut’ aamma ’avataaniit aningaasaliisoqarnissaanut’ nunat allat nunatsinnit aatsitassanik piserusuttut suleqatigineqarnerat annertusarneqassasoq allassimavoq.

Naalakkersuisoqatigiilersut misissuisarnermik periusissiortoqarnissaa kissaatigaat, piiaanermi aningaasaliinerit taamaalillutik iluanaarutigineqarlutik nunatta soqutigisaanut pillutik nalinginnaasumik ineriartornermut ilapittuutaassapput.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.