Nunarput nutaanik naalakkersuisoqalersoq

Demokraatit Inatsisartunut marsip aqqarnat 2025-mi qinersisoqarnerani ajugaanerminnik nalliuttorsiutiginnissinnaanerannit sapaatit akunneri marluk qaangiupput.

Demokraatit siulittaasuat, Jens-Frederik Nielsen tamatuma kingornali Inatsisartuni amerlanerussuteqarnissamut qulakkeerinissamut qinigaasunik arfinilinnik pissarsiniarlunilu naalakkersuisunik nutaanik pilersitsiniarsarilerpoq.

Suliaq annertooq maanna naammassineqartoq KNR-imit paasineqarpoq.

Nunarput nutaanik naalakkersuisoqalerpoq, tassa Demokraatit, Inuit Ataqatigiit, Atassut Siumullu.

Partiit sisamat ataatsimoorlutik Inatsisartunut qinigaaffinnit 31-nit 23-nik qinigaatitaqarput, taamaalillutillu amerlanerussuteqarluarlutik.

Siornatigut suleqatigiilluareersimasut

Inuit atasiakkaat qilersorsimannginerannik, aammali tamat periarfissaqarnissannik pingaartitsisut Demokraatit, samerliit Inuit Ataqatigiit, taalerpilliusut Atassut  aamma socialdemokratiskiusut Siumut Naalakkersuisoqatigiinnissamik isumaqatigiissuteqartuupput.

Naak partiit susassaqarfinni politikkikkut assigiinngitsorpassuarnik pingaartitaqaraluarlutik ataatsimut isumaqatigiissutissarsillutillu naalakkersuisoqatigiinnissamik iluatsitsipput.

Naalakkersuisoqatigiinni partiit anginerpaat - Demokraatit IA-lu naalakkersuisuni suleqatigiinnermik misilittagaqareerput.

Inatsisartunut 2009-mi qinersinerup kingorna IA-p naalakkersuisut Demokraatinik maannalu atuukkunnaarsimasumik Kattusseqatigiit Partiiannik ilaqartut pilersippai, tassanilu Kuupik Kleist (IA) naalakkersuisuni siulittaasuuvoq.

Demokraatit siulittaasuuffeqassasut

Naalakkersuisutut atuuffiit assigiinngitsut agguataarneqarnerat pisortatigoortumik suli uppernarsarneqanngilaq, Demokraatilli atuuffiit pingaarnerpaat, matumani naalakkersuisut siulittaasoqarfiat akisussaaffigissavaat.

Inuit Ataqatigiit siulittaasuat, Múte B. Egede nunanut allanut naalakkersuisunngortussatut naatsorsuutigineqarpoq – atuuffik taanna nunarsuarmi pissutsit USA-miillu qanilliartortoqarnera pissutigalugu ukiuni aggersuni qitiulluinnassaaq.

Naleraq naalakkersuisoqatigiinni nutaani ilaalinngitsoq ataasinngornermi saqqummiunneqareerpoq.

Jens-Frederik Nielsenip tusagassiuutinut nalunaaruteqarnermini namminiilivinnissamut aqqut pillugu apeqqut suleqatigiinnissamut pingaartumik aporfiunerarpaa:

- Nalerarlu arlalitsigut isumaqatigiiffissaqarsimagaluarpugut, taamaattorli namminersorneq pillugu inatsimmi §21-p aallarnisarneqarnissaanut tunngasumut isumaqatigiiffeqarnissaq ajornarsimavoq. 

Naleraq taamaalilluni Inatsisartuni partiini kisiartaalluni naalakkersuisoqatigiinni ilaalinngilaq. Naak Naleraq marsip 11-anni qinersisoqarnerani taaguunneqarluaraluarluni tamanna pivoq.