Naalakkersuisoqatigiit pillugit annilaarnartoq: Isumaqatiginninniarnerit aallartittut – sunaluunniit mattunneqanngilaq
Inatsisartunut qinersinermi kisitsineq naammassereerpoq inuiaallu nipaat tusaaneqarput. Naalakkersuisoqatigiilernissamut isumaqatigiinniarnerit aallarteruttorput, naalakkersuisoqatigiilernerlu assigiinngitsunik sammiveqarsinnaavoq.
Taama KNR-imi aaqqissuisoq akisussaasoq Jens Thorin naliliivoq. Taassuma ukiorpassuarni nunatsinni politikki malinnaaffigisimavaa, periarfissallu ilimagineqarsinnaasut marluk tassaapput:
Siullertut, naalakkersuisoqatigiit tassaasut Demokraatit aamma Inuit Ataqatigiit, ataatsimut 17-inik ilaasortaatitaqartut amerlanerussuteqalaarlutillu. Inatsisartuni ilaasortaasinnaasut katillugit 31-upput, amerlanerussuteqassagaannilu 16-inik ilaasortaqartariaqarpoq.
Partiit taakku marluk naalakkersuisoqatigiinnikuupput, namminiilivinnissamullu aqqut peqqissaartumik piffissaqarluartumillu namminiilivikkiartuaarnissaq isumaqataaffigalugu.
Rasmus Leander Nielsenillu taakkua naalakkersuisoqatigiilernissaat ilimagivaa. Taanna Ilisimatusarfimmi politikkimut tunngasuni immikkut ilisimatusartuuvoq, qinersinerullu aqaguani International Press Centerimi tusagassiortunik katersortitsisoqarnerani inernerit misissoqqissaarpai.
- Demokraatit IA-mik naalakkersuisoqateqalernissaat eqqoriaanermi ilimaanaateqarnerpaapput. Naalakkersuinermili IA tulliulluni inissisimanissaminut piumassanersoq apeqqutaassaaq.
Naalakkersuisut aalaakkaasut pisariaqartinneqartut qineqqusaartoqarnerani Múte Borup Egedep arlaleriarluni oqaatigisarpaa. Naak IA “nukkatut” inissisimalluni Demokraatit naalakkersuisoqatigiileraluarunilluunniit nunarsuarmi pisut peqqutaallutik partiit suleqatigiinnerulersissinnaavaat.
- Nunarsuarmi tamarmi naalakkersuinermik ingerlatsineq pillugu Múte B. Egede oqaaseqartarnera tunngaviusinnaavoq, siunissami nunatsinnik politikkikkut aaalajaallutik sullissisinnaasunik naalakkersuisoqatigiinnik nukittuunik aalaakkaasunik pisariaqartitsisoqassaaq, Rasmus Leander Nielsen oqarpoq.
Demokraatit, IA aamma Atassut
Aappaattut, Atassut IA-mut Demokraatinullu ilanngutitinneqarnissai naalakkersuisunngortussatut eqqoriarneqarsinnaavoq, Jens Thorin naliliivoq.
- Naalakkersuisoqatigiit taakkuussagunik eqqissillutik sulisinnaapput. Tassami Demokraatit Atassullu tamarmik partiit talerpilliupput. Qineqqusaartoqarnerani imminnut kimmaatinngitsut, suleqatigiinnissaminnullu piareersimarpasittut maluginiarpara, Jens Thorin oqarpoq.
Partiilli taakku marluinnaallutik amerlanerussuteqalersinnaanngillat taamaammat IA ilaavoq. Malunnaatilinnimmi soorlu namminiilivinnissarmi pillugu isumaqatigiipput, aningaasaqarnerli anguneqaraangat assortuussutaalertartoq, taanna naliliivoq.
- Talerpilliit akileraarnikinnerusalernissaq sulissutigerusukkaat IA-p sulissutigerusunngilaa, taanna oqarpoq.
Partiilli taakku pingasuullutik naalakkersuisoqatigiilissagunik amerlanerussuteqangaatsialerlutik 19-inik ilaasortaatitaqalissagaluarput.
- Demokraatit IA-lu naalakkersuisoqatigiilersinnaaneri immaqa aamma ataatsikkoortillugit Atassut ilanngullugu eqqoriarpara. Maanna ilisimasakka malillugit taama eqqoriarpara, Rasmus Leander Nielsen oqarpoq.
Naleqqap suleqatigineqarnissaa ilimaginngikkaat
Taava Naleraq partii sungaartoq aappaluaartumik qalipaatik qinersinermi 25 procentiinik taaguunneqarnermigut nunatsinni partiini anginersat tullinngortoq. Taamaakkaluartoq partiip siunissami naalakkersuisuni suleqataanermigut sunniuteqassagunanngitsoq, Jens Thorinip nalilerpaa:
- Sunniuteqalersinnaanngillat. Partiinut allanut Naleqqap suleqatiginissaa ajornakusuussaaq. Naleqqammi namminneq politikkiminni namminiilivinnissamut allanullumi isummaminnik ingerlatserusuttuupput. Namminneq isummaminnik nikisitsinatik allat isumaannik ajornasaartuupput, Jens Thorin oqarpoq.
Ilimanannginnerusut
Vivian Motzfeldt Siumumi qinersinerup kingorna siulittaasunngorpoq.
Partii naalakkersuisoqataalerusunngitsoq, Siumullu illuatungiliuttutut inissippat inuiaqatigiinut pitsaanerussasoq, taanna KNR-imut oqarpoq – aamma naalakkersuisoqatigiilersussat kikkuugaluarpataluunniit.
Siumulli qinigaaffiup ingerlanerani naalakkersuisunut ilanngussinnaanissaa peratarsinnaavoq. Taama pisoqartareersoq, Rasmus Leander Nielsen oqarpoq.
- Naalakkersuisoqatigiit piffissap ingerlanerani allanngorsinnaasartut nalunngilarput, partiillu nutaat imaluunniit partii suleqataajunnaartoq imaluunniit partiit kingusinnerusukkut suleqataalersut takusarparput.
- Siumut Demokraatillu ataatsimut 14-inik ilaasortaatitaqarput. Demokraatit IA-lu isumaqatigiissinnaassanngippata, taakku Atassut ilanngullugu naalakkersuisunngortitsisinnaapput. Tassa naalakkersuisoqatigiiliornissamut periarfissat arlaqaalupput, suullu tamarmik suli ammapput, Rasmus Leander Nielsen oqarpoq.
