Inatsisartunut qinersineq marsip aqqarnani naammassimmat marlunngornerup unnuaani ataatsip missingerluinnaraa partii illuatungiliuttuusimasoq Demokraatit siuttunngortoq paasinarsivoq.

Demokraatit naalakkersuisunngortitsinissaq siunertaralugu partiinut isumaqatigiinniarnernik aallarnisaanissamut pisinnaatitaaffeqarpoq.

Tamannalumi ippassaq aallartippaat.

Nunatta oqaluttuarisaanerani partii Siumut marloriaannarluni naalakkersuisooqataanngitsoornikuuvoq, qinigaaffimmilu uani Demokratit ajugaarujussuarfianni naalakkersuisooqataanngitsooratarsinaalluni.

Siumullumi siulittaasortaavata, Vivian Motzfeldtip ullua tungiliuttunngorumaarnertik maanna KNR-imut apersorneqarnermini ilimasaarutigivaa .

- Suleqatigiinneq iniuaqatigiit pisariaqartitaat aamma illuatungiliuttuunermiippoq suliat eqqortumik ingerlanneqarnerani illuatungiliuttoqarneq aamma taanna pisussaaffiuvoq, taanna oqarpoq nangillunilu:

- Taamaammat imaanngilaq kikkut tamarmik katersorlutik naalakkersuisooqatigiinnik pilersitsineq tassaasoq kivitseqatigiinneq, tamat oqartussaaqataanerat tamakkiisoq aamma illuatungiliisinnaassutsimiippoq, taamaammat taanna ersarissaaffigilaarusuppara.

Vivian Motzfeldtip oqarnini naapertorlugu qinersisoqarnerani nunatsinni qinersisartut kikkut siuttorerusunnerlugit taasinerannik ataqqinnippoq.

Inuit Ataqatigiit pissangasut

Nunatsinni politikkikkut oqaluttuarisaaneq qiviassagaanni Inuit Ataqatigiit illuatungiliuttuuneq sungiusimaqaat.

Uanili qinigaaffik siuttuusimalluni maanna qanoq inissinnissartik pissanngatigigaat, partiip siulittaasua Múte B. Egede oqarpoq.

- Soorunami aallarniutaasumik aggersagaanikuuvugut, kisianni tusagassiorfitsigut aggersagaanerit qanoq ingerlaneri ingerlanissaalu eqqartornavianngilakka, taanna oqarpoq nangillunilu:

- Maannamiit qanoq ingerlariaqqittoqarnissaa taanna pissangagineruara aamma qilanaarivakka ullut aggersut.

Naalakkersuisooqataalerniaraannilu naaperiaanermi ilaatigut partii pilliuteqartariaqartarpoq. Inuit Ataqatigiimmita naalakkersuisooqataalissagaluarunik sunimmita pilliuteqassappat?

- Soorunami suleqatigiissinnaaneq taanna uagut ammaffigiuaannarparput, kisianni aamma naleqartitaqarpugut, naleqartitagut aamma akiginavianngilagut imaaliinnarlugit. Taamaammat qanoq ingerlasoqarumanersoq massakkut oqaloqatiginninnerni siuttuusuninngaanniit takussavarput, tassanngaanniillu ingerlanneqaqqikkumaarpoq, Múte B. Egede oqarpoq nangillunilu:

- Uagut toqqammavigut nalunngilagut, aammalu qanoq ingerlarusunnerput nalunngilarput, tassaniipporlu toqqammavipput uagut massakkut.