Unnuk qinersivik naajartulersorlu paasinarsivoq Demokraatit qinersinermi angusarissaagaatsiartut. Sooq taama angusarissaartiginersut pillugu KNR-ip siulittaasoq Jens Frederik Nielsen apersorpaa.

Jens Frederik Nielsen, qinersineq naammasseqqammerpoq – qanoq ippit?

- Tassa nuannaarlungalu assorujussuaq tulluusimaarpunga. Kisianni soorunami aamma qasulaarpunga ulloq imaannaanngitsorsuaq ippassaani aqqusaaratsigu.

Suna imaannaanngitsorsuaq? 

- Tassami naatsorsuutigineqarsimagunanngilaq, Demokraatit taama annertutigisumik siuariassasut, allaat nunatsinni partiini anginerpaanngorluni. Taanna tamatta soorunami tupaallaatigaarput, naak nalunngikkaluarlugu ilungersornikuulluta. Siuariarnissarput neriuutigisimavarput aamma qularivallaarnagu. Partii anginerpaajussasugut qinersisartut toqqarpaatigut tamannalu tulluusimaarutigivarput.

Ajugaanersi sumik tunngaveqarsoraajuk?

- Ukiuni kingullerni arlaqartuni partiit aalajangersimasut aqutsuunikuupput taanna imminermini ajunngilaq, kisianni ukiuni kingullerni sisamani aalajangiinerit annertuut aamma pinikuupput. Taakkua inuiaqatigiinni aalassatsitsinikuupput, taamaammat inuiaqatigiinni saqikkiartortoqarnera malugisimavarput. Pissutsit taakkua inuiaqatigiinni assoralisimaartitsisimapput, toqqissisimannnginnermillu pilersitsinikuullutik, tamanna qularinngilara.

Qinigaanerpaanersi annertuumik partiissinnut minnerunngitsumillu ilinnut pisussaaffiliisoq?

- Annertoorujussuarmik pisussaaffiliivoq. Aamma akissussaafferujorujussuaq uagutsinnut tunniunneqarpoq, isumaqatigiinniarnerit aallartittussanngorpagut. Pisussaaffik taanna annertooq qujassutigalugulu maninguulluta suliariniarsarissavarput, taanna qularutissaanngilaq. Kisianni maannamut nuannaarutigiinnarparput taama angusaqarnerput tulluusimaaqaagullu.

2021-mi qinigaaffik aallartimmat ersarittorujussuarnik marlunnik nassueruteqarnikuuvusi, siulleq: Kuannersuit ammannginnissaat - aappaattut: Akitsuusersuinerup pissussimasoorsimannginnera.

Taakku qinigaalluarnissinnut pisooqataasimasinnaanerlutik?

Aap, tamanna qularinngilara, aamma taakkua apeqqutit marluk qinersinermi kingullermi initoorujussuupput. Uagut partiitut soorunami aamma innuttaasut tusaallugit tamat oqartussaaqataanerat ataqqillugu politikkerput naleqqussarnikuuvarput, amerlanerussuteqartut ataqqillugit. Saniatigut aamma sukataarutiginikuuvarput inuuniarnerup nunatsinni akisunerujussua, taamaammat akitsuutit piiarnissaannik siunnersuuterpassuit qaqinnikuuvagut. Demokraatininngaanniit ataqqinnilluta innuttaasut oqariartuutaannut naleqqussarsimanerput sunniuteqarsimasinnaavoq.