Naalakkersuisoq akuersissutinik tunniussisinnaavoq

- Naalakkersuisoqarfiup oqartussaaffiani suliassat naalakkersuisumit sulinikkut ingerlanneqarnissaat tunngavimmigut ajirnanngilaq.

Anders Jørgensen Ilisimatusarfimmi inatsisilerinermik immikkoortortaqarfimmi ph.d.-nngorniarluni ilisimatusartoq taama oqarpoq.

Naalakkersuisup sulianik ingerlatsisutut atuussinnaneranik apeqqut soqutiginarsivoq Jess Svanep Siumumeersup Aqqaluaq B. Egede (IA) aalisarnermut naalakkersuisuusoq isornartorsiormagu atuuffimmi siuliminik pasinarsaaraluni ima oqarsimammat:

- Naalakkersuisunut toqqaannavittumik oqaatigivaa ukiunik kingullernik 20-nik aalisarnermut akuersissummik sianiinnarluni qinnuteqarluni tunniussisoqartarsimasoq.

Naalakkersuisoq sulianik ingerlatsisutut atuutissappat ajunngilaq 

Suliaq pineqartoq akuersissutillu suuneri isummerfiginngikkaluarlugit Anders Jørgensen isumaqarpoq naalakkersuisoq sulininik ingerlatsisinnaalluartoq. 

Pisortani sulianik ingerlatsinermut malittarisassanik atuuttunik malinnilluni ingerlatsineq pingaarneruvoq, Anders Jørgensen erseqqissaavoq.

- Naalakkersuisoq naalakkersuisoqarfimmi ingerlatsinermut qullersatut pisortani sulianik ingerlatsinermut malittarisassanik atuuttunik malinnittussaavoq. Oqartussaaffiup iluani malittarisassanuinnaaq tamanna atuutinngilaq (ass. aalisarnermut tunngasuni aalisarnermut inatsit), kisianni aamma ingerlatsinermut malittarisassani ilaatigut piginnaatitaaneq aamma suliamut tunngasunik ingerlatsineq atuupput, Anders Jørgensen oqarpoq.

LÆS OGSÅ Sianiinnarluni akuersissutinik pissasisoqartartoq Aqqaluaq B. Egede oqarpoq: Atinik saqqummiussisoqassasoq Siumup piumasaraa

Naalakkersuisup sulianik ingerlatsineratigut tunngaviatigut kukkusoqarsimanngikkaluartoq, Aqqaluaq B. Egedep Jess Svanemut akissummini qularnaveeqquserpaa suliat naalakkersuisumut anngunniariartut atorfilinnut ingerlateqqinneqartartut:

- Saaffiginnissutit taamaattut Naalakkersuisup allaffissortunit siunnersuiffigineqarlutillu suliarineqartussanngorlugit ingerlateqqissimavai. Aalisarsinnaanissamut akuerineqarnissamut tunngavissat naammassineqarsimatillugit qinnuteqartut akuersissummik tunineqartarput.

Taamaakkaluartoq Jess Svane Siumut sinnerlugu Inatsisartunut ilaasortaasoq  isumaqarpoq  Aqqaluaq B. Egede siornatigut naalakkersuisuusimasunut utoqqatsertariaqartoq:

- Aqqaluaq B. Egedep pasisaarutigaa kukkusumik iliortarsimasut, taamalu atorfilittut sulianik ingerlatsinermikkut tatiginanngitsuusut. Tamanna utoqqatsissutigisariaqarpaa, Jess Svane oqarpoq.   

Ataatsimiititaliarsuaq: Politikerit aalajangiisarunnaassapput 

Siorna Aalisarnermut Ataatsimiititaliarsuup innersuussutigaa akuersissutinut aqutsisoqarfik pilersinneqassasoq, taannalu aalisarnermut inatsimmik ingerlatsisuussasoq pisassiissutinik aamma akuersissutinik tunniussisartuulluni. 

AAMMA ATUARUK Aalisarnermut ataatsimiititaliarsuaq: Politikerit pisassiissuteqartarunnaassapput

Taamani Aalisarnermut Ataatsimiititaliarsuup siulittaasua Jens Paulsen oqarpoq aqutsisoqarfiup ilaatigut qulakkiissagaa akuersissutinik tunniussineq politkerinit ungasillineqassasoq, taamalu aalajangiinerit allanik eqqarsaateqarnermit sunnerneqannginniassammata:

- Tassani ungasillilaarnissaat eqqarsaatigineqarpoq. Tassami isertuunneqarsinnaanngilaq aalisarnermut naalakkersuisoqarfik aalajangiippat, taava politikkikkut pisortaqarpoq aalajangikkanut sunniuteqartumik. Tamatuma kingunerisinnaavaa aalajangikkat suliamuinnaq tunngaveqartumik aalajangiiffigineqarnissaat eqqortinneqartuaannanngitsoq, Jens Paulsen oqarpoq.

• Suliaq pillugu naatsumik:
• Ilulissani aalisartunut isumasioqatigiisitsineq marsip aappaani ingerlanneqarnerni, Aalisarnermut naalakkersuisoq, Aqqaluaq B. Egede (IA) ima oqarpoq:
• - Assersuutigalugu ukiut kingulliit 20-t qiviassagutsigit, taava amerlasuut, naalakkersuisumut toqqaannarlutik sianerlutik pisassanik akuersissutinik pissarsisarput.
• Tamanna Jess Svanemit kamaatigineqarpoq.
• Aqqaluaq B. Egede pasinarsaarerpalaartumik nipeqartoq, taamaammallu utoqqatsertariaqartoq, Jess Svane isumaqarpoq.
• Demokraatit Atassutikkullu aamma naammagittaalliorput – kisianni Aqqaluaq B. Egede suli amerlanerussuteqarpoq.
• Naalakkersuisorli oqarasuaatikkut toqqaannartumik pisassanik akuersissuteqarsinnaanera unioqqutitsinerunngilaq.
• Pisassanik akuersissutinik pissarsiniaraanni Sullissivik.gl-ip nittartagaa aqqutigalugu ullumikkut qinnuteqartoqartarpoq. Aqqaluaq B. Egedep oqarnera naapertorlugu nammineq naalakkersuisuunermi nalaani allaffissornikkut tamakkut ingerlanneqartartut, taanna sermitsiaq.ag-mut oqarpoq.
• Aalisarnermut naalakkersuisoqarfiup paasissutissiinera naapertorlugu inuit qassit naalakkersuisumut toqqaannartumik saaffiginninnermikkut akuersissutinik pisimanersut kisitsisaatigineqanngitsut, sermitsiaq.ag paasissutissiivoq.