Sianiinnarluni akuersissutinik pissasisoqartartoq Aqqaluaq B. Egede oqarpoq: Atinik saqqummiussisoqassasoq Siumup piumasaraa
Aalisarnermut naalakkersuisoq, Aqqaluaq B. Egede (IA) perulluliutaavoq.
Aalisarnermut allattoqarfimmut sianiinnarluni pisassanik akuersissutinik pissarsisoqartarsimasoq uani qaammatip ingerlanerani aalisarnermut isumasioqatigiisitsinermini oqaatigaa.
Uani aalisartoq minnerpaamik ataaseq pineqarpoq, taanna aalisarnermut allattoqarfimmut sianiinnarluni pisassanik akuersissutinik pissarsisimavoq.
Pisassanik akuersissutinik pissarsiniaraanni sullissivik.gl-ip nittartagaa aqqutigalugu qinnuteqartoqartarpoq – oqarasuaatikkut qinnuteqarneq nalinginnaanngilluinnarpoq.
Naalakkersuisuusimasumik pasinarsaarerpalaarisoq
Tamanna Siumumeersumit Jess Svanemit tupaallaatigineqarpoq. Taassumami Aqqaluaq B. Egede aalisarnermut naalakkersuisuusimasunut pasinarsaarerpalaarnerarpaa. Aqqaluaq B. Egede Ilulissani marsip aappaani aalisarnermut isumasioqatigiisitsinermini taama oqartoq, Jess Svane oqarpoq:
- Ukiunik 20-nik kingullerni naalakkersuisumut sianiinnarluni pisassanik akuersissutinik pissarsisoqartarsimavoq.
Aalisarnermut aqutsisoqarfik taamatut pisasseeriaaseqarsimasoq Aqqaluaq B. Egedep aalajangiusimavaa.
Aqqaluaq B. Egede amerlanerussuteqartoq
Inuit Ataqatigiit Inatsisartuni aqqaneq-marlunnik ilaasortaatitaqarput.
Naleraq 16-iusut sisamanik ilaasortaatitaqarput.
Illuatungiliuttut Siumut qulinik ilaasortaatitaqarput, Demokraatit pingasut Atassullu marluk.
- Aalisartut naalakkersuisunut toqqaannartumik attaveqarnermikkut akuersissutinik tunineqartarsimasut, Jess Svanemut akissuteqaatiminik allappoq.
Akissuteqaammullu ima itisiliivoq:
- Aalisartut siornatigut Naalakkersuisumut toqqaannartumik saaffiginnillutik aalisarsinnaanissamut akuersissummik pissarsiniartarsimanerat ileqquusimavoq. Saaffiginnissutit taamaattut Naalakkersuisup allaffissortunit siunnersuiffigineqarlutillu suliarineqartussanngorlugit ingerlateqqissimavai. Aalisarsinnaanissamut akuerineqarnissamut tunngavissat naammassineqarsimatillugit qinnuteqartut akuersissummik tunineqartarput. Atinik taasinianngilanga, erseqqissaatigissalluguli tamanna siusinnerusukkut ileqquusarsimammat.
Siumup Aqqaluaq B. Egede akissuteqarnissaanik piumasaqarfigigaa
Tamanna ilumuunngilaq, Siumumeersoq Jess Svane oqarpoq.
- Naalakkersuisunut toqqaannavittumik pasinarsaaraluni oqaatigivaa ukiunik kingullernik 20-nik aalisarnermut aalisarsinnaanermut akuersissummik sianiinnarluni qinnuteqarluni tunniussisoqartarsimasoq.
- Taamaammat taanna qisuariarfigalugu apeqqutigivara kikkunuku naalakkersuisut pineqartut. Aamma taanna uppernarsarneqarsinnaappat kikkut aalisartitseqatigiiffiit sianilaaginnarlutik akuersissutinik pisarsimanersut paasiniarlugit aperaara, Jess Svane KNR-imut oqarpoq.
Politikerit Siumumik tunuliaqutaqartut arlaqartut aalisarnermut naalakkersuisutut inissisimanikuupput. Taakku ilagaaq, Hans Enoksen, Karl Kristian Kruse, Nikkulaat Jeremiassen aamma Jens Immanuelsen ilaatigut aalisarnermut naalakkersuisuusimapput.
Kikkorpiaalli pineqarnersut taaneqarnissaat, Jess Svanep Aqqaluaq B. Egedemut uppernarsaqquaa.
Maannamut killiffik eqqarsaatigissagaanni Aqqaluaq B. Egedemut politikikkut kinguneqarsinnaanngilaq.
Taannami politikkikkut tunuliaqutaminik suli amerlanerussuteqarpoq. Jess Svane tatiginnikkunnaarnerminik oqariatuuteqarusunngilaq, Naleraq Atassullu suli tatiginnipput.
- Unioqqutitsisoqarsimaneranik suli takusaqarsinnaanngilanga. Taamaammat akissuteqarnissaa utaqqivara, Jess Svane oqarpoq.
Tassunga tunngatillugu Demokraatit siulittaasuat ima oqarpoq:
- Naalakkersuisoq atinik saqqummiussisariaqarpoq. Taamaaliornianngippat tatigiunnaarparput.
Naleqqamiilli tapersersorneqarpoq:
- Tatigineqarunnaassappat tupaallannassaqaaq. Ersarilluinnartunimmik nassuiaateqareerpoq, Jens Napaattooq oqarpoq.
