Múte B. Egede: Kommuni suleqatigalugit piniartut ikiorserneqassapput

Juullip qaammataa aallartisimatsiartorli nunatta avannaani tunumilu piniartut aningaasatigut ikiorserneqarnissaminnik noqqaassuteqalerput.

Maanna juullerluinnalersoq Naalakkersuisut qanoq ikiuinissaminnut ersarissumik suli nassaanngillat.

Tamanna Naalakkersuisut siulittaasuat Qanoruumi pulaartorineqarmat paasinarsivoq.

-Piniartut noqqaanerat paasilluarsinnaavara. Aamma naalakkersuisut susassaqarfimmi iluani iliuuserisinnaasatik oqariartuutigisimavai, maannamullu naalakkersuisuninngaanniit periarfissanik arlalinnik ujartuivugut, Naalakkersuisut siulittaasuat Múte B. Egede oqarpoq.

AAMMA ATUARUK Avannaata Kommuniani borgmesterip Naalakkersuisut Avanersuarmi piniartunut ikiorseeqquai

Piniartut ikiorsinneqarnissaannut tunngatillugu piniartut namminneerlutik kommunerisarminnut saaffiginnillutik ikioqqussasut, isumaginninnermut, suliffeqarnermut, nunamullu namminermut naalakersuisup sapaatit akunnerata siuliani nalunaarutigaa.

Tassa piniartut kommunerisaminnut suliffissarsiortutut nalunaaruteqassasut, nalunaaruteqarunillu nalilersuineq aallaavigalugu ikiorserneqarsinnaassasut, taamatullu aaqqiiniarneq politikerinit KNAPP-miillu isornartorsiorneqarput.

AAMMA ATUARUK Naalakkersuisut nunatta avannaani piniartunut suliffissarsiornissaannik kaammattuinerat: Isornartorsiorneqangaatsiarpoq

Suliaq kommunimut miloriunneqarani naalakkersuisut namminneq aamma iliuuseqarnissaannik ilaatigut oqariartuuteqarput.

Kommunit pisariaqartinneqartut

Kommunili avaqqunneqarsinnaarpasinngilaq.

- Pisariaqartitsisut qanoq annertutiginerat ikioqatigiissutigalugu suleqatigiissutiginissaannut alloriarsinnaajumalluta, taamaalilluta kommunit peqatigalugit pingaartumillu pisariaqartitsisut iliuuseqarfigisinnaanissaannut allorissaaqatigiissinnaaniassagatta.

AAMMA ATUARUK Naalakkersuisoq Kulusummi uuliakoortoqarnera pillugu: Ilungersunartuuvoq

Avannaani Qaanaami nunaqarfiinilu piniartut Thulefondenimiit Ilulissanilu innarluutillit peqatigiiffiannit "Tasiunnga"-mit aningaasanik tunissuteqarfigineqarput.

Taakku saniatigut Great Greenlandip nunatsinni piniartunut ukiut tamaasa bonusit tunniuttagai avannaantu tunumilu piniartunut ukioq manna siusinnerusukkut tunniuppaat.

- Ullunilu kingullerni naalakkersuisuninngaannniit naalakkersuisoqarfiillu ilaaninngaanniit kommunit tamaasa oqariartorfigalugit saaffigineqarput, Múte B. Egede oqarpoq.

Nunatta avaannaani ukiorluummat piniartut piniariarsinnaanatik iluamik isertitaarupput. Aamma tunumi Kulusummi mittarfeqarfiup dieseloliemik imaanut kuuttoorneratigut kulusummi piniartut piniagaaq tammagarneratigut tunisassaarullutik aamma ikiorserneqarnissaminnik noqqaassuteqarput.