USA-p Kalaallit Nunaat "tiguarnavianngikkaa", USA-p Kalaallit Nunaanni immikkut aallartitaa Jeff Landry isumaqarpoq.

USA-p præsidentia Donald Trump Kalaallit Nunaata “tiguarnissaanut” piareersimanersoq tusagassiorfimmit CNBC-mit aperineqarami taama oqarpoq.

- Naamik, taama isumaqanngilanga, aamma oqaaseqaatimini taanna pigaa ilimaginngilara, Landry tusagassiutinut oqarpoq.

Kalaallit Nunaata pinngitsaaliilluni tiguarniarneqarnera akuerineqarsinnaanngitsoq aamma erseqqissarpaa.

USA-p "nunamik allamik tiguaaniarsarinissaq" imaluunniit "allamiut nunaannik tiguaaniarsarinissaq" pilersaarutiginngikkaa, decembarimili aallartitap immikkut ittup Fox Newsimut erseqqissarpaa.

Monroe-p ajoqersuutaanik pimoorussingaartoq

Nunap isumannaatsuunissaa pissutigalugu USA-p Kalaallit Nunaat pisariaqartikkaa, Trumpip pimoorutivillugu ulluni kingullerni arlaleriarluni oqaatigaa.

Naak Jeff Landryp Trumpip Kalaallit Nunaannik tiguaaniarluni pilersaaruteqarnera ilumuunnginneraraluaraa, USA-mi præsidenti Monroe-p ajoqersuutaanik "pimoorussingaartoq", CNBC-mit apersorneqarnermini arlaleriarluni erseqqissarpaa.

Ajoqersuut taanna USA-mi præsidentiusimasup James Monroe-p 1823-mi Kongressimi oqalugiaammini saqqummiuppaa.

Europamiut nunasiaatilittut pissaaneqarnerpaartaat nunallu allat nunarsuup affaata kitaaniittut – tassa Amerikap avannaaniittut kujataaniittullu, ilaatigut Kalaallit Nunaata – akuliutinnginnissaat siunertaavoq. Akerlianik USA Europami sorsunnernut akerleriinnernullu peqataanaveersaartussaavoq.

- Nunarsuup affaata kitaata ataqatigiinnerulernissaa USA-mut iluaqutaassasoq isumaqarpunga, Kalaallit Nunaallu nunarsuup affaata kitaaniippoq, Landry tusagassiorfimmut oqarpoq.

USA-p præsidentia "suut tamaasa atorsinnaallugit” isumaqartoq, aallartitaq nangilluni oqarpoq.

- Suulluunniit tamarmik atorsinnaasut isumaqarpit? tusagassiortoq CNBC-meersoq aperivoq.

- Kalaallit Nunaannut tikeraartariaqarpugut aperalutalu: Suut periarfissatut isigivisigit? Europap tunniussinnaanngisai suut tunniussinnaavagut? Landry akivoq.

/ritzau/