Kalaallit Nunaata tiguarnissaa "nunap isumannaatsuunissaanut pingaaruteqartuusoq“, USA-p præsidentiata Donald Trumpip erseqqissarpaa.

Reuters naapertorlugu nutaarsiassaqartitsiviup apeqquterpassui akissutigitillugit Det Hvide Hus allakkatigut taama nalunaaruteqarpoq.

Trumpip suleqatimilu “nunanut allanut politikkimi anguniagaq pingaarutilik tamanna anguniarlugu” periarfissat assigiinngitsut oqaloqatigiissutigigaat, ilanngullugu ilisimatitsissutigineqarpoq.

- Soorunamilu USA-p sakkutuuinik atuinissaq naalagaanersap periarfissatut isigiuaannarpaa, Reuters naapertorlugu oqaaseqaammi taama allassimasoqarpoq.

Trumpip siunnersortaasalu ilaatigut Kalaallit Nunaata Danmarkimit pisiarineqarsinnaanera eqqartoraat, tusarliisoq kinaassutsiminik isertuussisoq, atorfilittatut qaffasissutut oqaatigineqartoq, aamma tusagassiorfimmut oqaluttuarpoq.

Eqqunngitsumik saqqummiussisartut

Kalaallit Nunaata tiguarneqarnissaanut apeqqut puiorneqarnavianngitsoq, Trumpillu maannakkut præsidentiunermini Kalaallit Nunaat Amerikamiunit tiguarneqarnissaa kissaatigigaa, tusarliisoq nangilluni oqarpoq.

Pilersaarutit malillugit Trump 2029-p aallartinnerani præsidentiujunnaassaaq.

USA-mi Nunanut allanut tunngasunut Aalajangiisartoqatigiinni immikkut ittumik marlunngornermi ataatsimiittoqarnerani USA-mut attaveqarneq oqaluuserineqareersorlu, Det Hvide Husimit kinaassutsiminillu isertuussisumit atorfilittamit oqaaseqaateqartoqarpoq.

Amerikamiut Kalaallit Nunaanni pisut eqqunngitsumik saqqummiuttaraat, ataatsimiittoqareernerata kingorna nunanut allanut ministeri Lars Løkke Rasmussen (M) oqarpoq.

Kalaallit Nunaata eqqaani russit Kinamiullu umiarsuarpassuaqarneranik aamma Kinap aningaasaliinertigut sunniuteqangaarneranik Amerikamiut oqaaseqarsimanerat eqqunngitsuusut, ilaatigut taassuma oqaatigaa.

- Kalaallit Nunaata Kinamiut aningaasaliinerannit aqunneqarneruneranik takorluugaq ilisarinngilarput, nunanut allanut ministeri oqarpoq.

Ataatsimeeqatiserinnittut

Naalagaaffeqatigiit Kalaallit Nunaannik isumaginnissinnaanerannik USA aamma qularinnilersimavoq - tamannalu Lars Løkke Rasmussenip ilumuunnginnerarpaa.

Aamma marlunngornermi naalakkersuisut danskit naalakkersuisuinik USA-llu nunanut allanut ministerianik Marco Rubiomik ataatsimeeqatiserinnipput.

Nunanut allanut tunngasunut naalakkersuisoq Vivian Motzfeldt naapertorlugu "USA-p Kalaallit Nunaat pillugu oqaaseqaatai maluginiarnartut eqqartornissaat“ siunertaavoq.

Trumpip 2019-imi siullermeerluni Kalaallit Nunaata Amerikamiunit pigilerneqarnissaa eqqartorpaa. Novembarimi aappassaanik præsidentitut qinigaaqqinnermi kingorna tamanna akuttunngitsumik eqqartortarpaa.

/ritzau/