Løkke: USA Kalaallit Nunaanni pisut pillugit kukkusumik saqqummiivoq

USA Kalaallit Nunaanni qanoq pisoqarnera pillugu kukkusumik saqqummiivoq.

Danmarkip nunanut allanut tunngasunut ministeria Lars Løkke Rasmussen(M), Folketingip nunanut allanut tunngasunut aalajangiisartuisa immikkut ittumik Danmarkimi marlunngornermi unnukkut ataatsimeereerneranni taama oqarpoq. Danmarkip USA-mut attaveqarnera tassani oqallisigisatuaavoq.

Russit Kinamiullu umiarsuaat amerlasuut Kalaallit Nunaata imartaani takussaasut ilaatigut oqaatigineqarpoq, soorluttaaq Kina nunatsinni aningaasaliingaatsiartoq oqaatigineqartoq.

- Kalaallit Nunaata Kinamit aningaasaliiffigineqangaatsiarneranik oqartoqassalluni kukkuneruvoq, Lars Løkke Rasmussen oqarpoq.

Paatsuuineq

Naalagaaffeqatigiit Kalaallit Nunaannik illersuisinnaassusiat Amerikamiunit aamma apeqquserneqarpoq, taamatullu oqartoqarnera Lars Løkkep aamma apeqquserpaa.

- Qanoq pisoqarneranik paatsuuisoqarpoq. Kunngeqarfik paarsaraarput, taanna oqarpoq, nangillunilu:
- Kunngeqarfiullu soqutigisai oqqakkiartuaarnikkut sulissutigineqarnavianngillat, taanna oqarpoq.

USA-p isumannaatsuunissaa pillugu Kalaallit Nunaat USA-mit pisariaqartinneqartoq USA-p præsidentianit Donald Trumpimit oqaatigineqareersorlu Folketingip nunanut allanut tunngasunut aalajangiisartui immikkut ittumik ataatsimiipput.

- Soorunami akuerinavianngilarput, aamma Kalaallit Nunaanniit tamanna akuerineqarnavianngilaq. Danmarkip isummani attappaa. Ataqqineqarnissaalu piumasaraarput. Apeqqutit suugaluartulluunniit Amerikamiut peqatigalugit oqaloqatigiissutigiumavavut, Lars Løkke Rasmussen oqarpoq.

Tunngavilersuutit apeqquseraat

USA-p nunanut allanut tunngasunut ministerianik ataatsimeeqateqarnissaq Danmarkip Kalaallit Nunaatalu kissaatigisimagaat, nunanut allanut naalakkersuisup Vivian Motzfeldtip Facebookikkut ippassaq unnukkut nalunaarutigaa.

Kissaatip taassuma ilassiluarneqarnissaa neriuutigalugu Lars Løkke Rasmussenip oqaatigaa.

USA-p Kalaallit Nunaannik aqutsilertariaqarneranut Donald Trumpip tunngavilersuutaasa ataatsimiinnikkut atorsinnaajunnaarsinneqarsinnaanissaat neriuutaavoq.

- USA-p præsidentia taama anguniagaqartoq ilungersunarpoq. Anguniakkap taassuma eqquutsinneqannginnissaa suliassaraarput. Tamannalu iluatsissagutsigu aqutsilersinnaanissamut tunngavilersuutit illuatungilertariaqarpavut, Lars Løkke TV2-mut oqarpoq.

Danmarkip Kalaallit Nunaanni isumannaallisaaniarnikkut iliuuseqanngippallaarneranik oqartoqarnera, Danmarkip illersornissamut ministeriata Troels Lund Poulsenip(V) aamma eqqortuusorinngilaa:

- Isumannaallisaanissamut 100 milliardit koruuningajannik aningaasaliinikuuvugut, taanna Folketingip nunanut allanut tunngasunut aalajangiisartui ataatsimeereersullu oqarpoq.

Danmarkillu Issittumi isumannaallisaaniarneq kisimiilluni kivissinnaanngikkaa taassuma ilanngullugu erseqqissaatigaa.

- NATO aqqutigalugu, taamalu USA aamma peqatigalugu, taamaaliortoqassaaq, taanna oqarpoq.

/ritzau/