Naalakkersuisoq Kulusummi uuliakoortoqarnera pillugu: Ilungersunartuuvoq
Kulusuup Mittarfeqarfiani tankimiit tankimut dieseloliemik decembarip tallimaani nuussisoqarnerani kukkuluttornikkut 120.000 literi sumut tamaannga kuuppoq.
40.000 literi nunami tatsimut kuuttoq milluarlugu katersorneqarpoq sinneralu imaanut kuulluni. Imaanut kuunnikoq suneqanngilaq, maannalu Kulusummi piniagassanut ulorianartorsiortitsilerpoq.
Suliaq pillugu
Mittarfeqarfimmi Kulusummi dieseloliep tankimut nuunneqarnerani 120.000 literi sumut tamaannga kuuppoq.
40.000 literi tatsiniit milluarlugu uterteqqinneqarpoq. Sinneruttorlu 80.000 literi upalungaarsimasut imaanut kuussimassangatippaat, siaruaassimassallunilu.
Kulusummi aalisakkanik tunitsiveqanngilaq, taamaammat puisip amia neqaalu inuussutigineqarpoq.
- Uuliakoortoqarnerata kingunerisaanik puisit Kulusuup eqqaaniittut tammararput, Kulusummi piniartut aalisartullu peqatigiiffiani siulittaasoq oqarpoq.
Taamaammat Kulusummi aalisartut piniartullu aningaasatigut ikiorserneqarnissaminnik naalakkersuisunut qinnuteqarput.
Kulusummi piniartup qassutimini puisi napissimasoq dieseloliemik sussaanngitsoq siumorpaa.
Kulusummi piniartut maanna inuussutissarsiorniarnermikkut ilungersunartumik inissisimalerput, juullilersorsuummallu ikiorsiissutinik qinnuteqarlutik Naalakkersuisumut noqqaassuteqarput.
AAMMA ATUARUK Kulusummi puisi uuliagasattoq pisarineqareersorlu - piniartut ikioqqusut
Kulusummili pisut naalakkersuisoqarfimmit ilungersunartutut isigineqartut, Isumaginninnermut, suliffeqarnermut nunamullu namminermut naalakkersuisoq KNR-imut oqarpoq.
- Kulusummi pisut saaffiginnissutaanikuupput. Taanna immikkuit ittumik eqqartorlugu aallartipparput, neriuppugut piffissamik qaninnerpaami tassunga tunngatillugu paasissutissanik oqaaseqarumaarluta, Jess Svane oqarpoq.
Kulusummi piniartutut inuussutissarsiutillit puisip amiinik tunisinermikkut akissarsiortarput.
Dieselolielli imaanut siaruaannerani puisit tammarartut, Kulusummi piniartut aalisartullu peqatigiiffianni siulittaasup oqaatigaa.
- Uuliakoortoqarnerata kingunerisaanik puisit Kulusuup eqqaaniittut tammararput, amia tunisarparput, aamma neqaa tuniniartarparput, maanna juullip qaammataani akissarsiutissaaruteriataarpugut, Kulusummi piniartut aalisartullu peqatigiiffiani siulittaasoq, Knud Kilime oqarpoq.
Ilungersunartumik tiguneqartoq
Kulusummi piniartut maanna ikiorsiissutinik naalakkersuisumut tunniussisimalereerput, tamannalu pillugu Isumaginninnermut, suliffeqarnermut nunamullu namminermut naalakkersuisoq ima oqarpoq.
- Avannaani piniartut silap pissusianik eqqugaallutik aamma ikiorsiissutinik qinnuteqaateqarnikuupput, taakku kommune suleqatigalugu ima aaqqiiffigaagut; piniartut suliffissarsiortutut nalunaarsornerisigut ikiorserneqarsinnaassapput, periuseq taanna aamma Kulusummi piniartunut atortinneqarataannaavoq, Jess Svane oqarpoq.
Puisu uuliamik sussaanngitsoq pisarineqartoq. Assi: Knud Kilime.
Naalakkersuisup taamatut aaqqiissuteqartoqarnissaanik nalunaaruteqarnera, KNAPK-miit sakkortuumik akerlerleqarneqarpoq.
Aalisartut piniartullu sila peqqutigalugu,silaannaallu pissusiata allanngoriartonerata kingunerisaanik ikiorserneqarnissaminnik qinnuteqarnerat KNAPK-p isiginiaqquaa. Naalakkersuisulli aalisartut piniartullu suliffissarsiortutut ikiorserneqarnissaannik aaqqiissuteqarniarnera sakkortuumk isornartorsorpaa.
- KNAPK siusinnerusukkut periutsit naapertorlugit immikkut ittumik pisoqartillugu immikkut ittumik ikiorsiiffigineqarnissamut qinnuteqarpoq, tassami piniartut aalisartullu piffissami sivisuumi isertitaqanngillat. Tamanna Naalakkersuisuniit isiginiarneqanngilaq, tassami piniartut aalisartullu arlaatigulluunniit misiginneqatigineqanngillat imaluunniit paaserusunneqaratik, KNAPK-mi siulittaasoq, Nikkulaat Jeremiassen tusagassiuutinut nalunaarummi allappoq.
Siumut: Ajunaarnersuuvoq
Kulusummi piniartut aalisartullu inuussutissarsiornermikkut, nerisassaqarniarnermikkullu kisimik eqqugaanngitsut, Siumup oqariartuutigaa.
Ilaqutaasut qanigisaasullu aamma eqqorneqartut, Siumut tusagassiuutinut nalunaartummi allappoq.
- Nalliuttut annerit takkutilerput, aningaasarsiornerlu sumiiffimmi unittuuissimasutut isigineqartariaqartoq isumaqarpunga, taamaattumillu akisussaaffimmik tigusisoqassasoq kissaatigaara, tamannalu piaarnerpaamik Naalakkersuisut isummerfigissagaat kaammattuutigaara, Siumumit inuussutissarsiorneq pillugu oqaaseqartartoq, Lars Poulsen oqarpoq.
Kulusummi dieseloliekoortoqarneranut tunngatillugu pingortitamut uumasunullu ulorianartuusoq, pinngortitamut ilisimasalinnillu Danmarkimiit misissuiffigineqartoq, Nunalerinermut, imminut pilersuinermut, nukissiutinut avatangiisinullu naalakkersuisoqarfik ilisimatitsivoq.
Tassungalu tunngatillugu Nunalerinermut, Imminut Pilersornermut, Nukissiutinut Avatangiisinullu Naalakkersuisoq, Kalistat Lund, angalanini peqqutigalugu oqaaseqarsinnaanngikkallartoq, taassuma naalakkersuisoqarfia KNR-imut ilisimatitsivoq.
