Misissueqqissaartartoq: Ukrainemi sorsunneq IA-p Siumullu akornanni eqqissinermik pilersitsisoq
Ruslandip Ukrainemut sorsunnerata Inuit Ataqatigiit Siumullu politikkikut aaqqiagiinngissutiminnik
Taanna IA-mi siulittaasuusimasvoq, maannalu Ilisimatusarfimmi Nunanut allanut aammalu Naalagaaffiup isumannaatsuunissaanik politikkimut tunngasumik Ph-D-liorluni ilisimatuunngorniuteqarpoq.
- Naatsorsuutigivara naliliinermi massakkut isasooqqajaasoqarsimappat Naalakkersuisooqatigiit siuliini, taannalu eqqoriaruminarpoq. Taava qinersisoqannginnissaa pillugu nunarsuarmilu massakkut sorsuttoqarnera eqqarsaatigalugu taamatut aalajangertoqarsimasoq, taanna Qanoruumi apersorneqarnermini oqarpoq.
AAMMA ATUARUK Politikkikkut alaatsinaatsup, Naalakkersuisooqatigiilersussat patajaatsuussanerpai
Sara Olsvigip sorsunneq nunarsuarmi qularnartoqangaatsiartitsisoq erseqqissaatigaa:
- Putinip qanoq periarsinnaanera eqqoriaruminnaappoq, NATO-millu ilaasortaasumik nunamik Putin saassussiallappat taava sorsunnersuit pingajuat naliliisartut arlalippassuit oqaatigaat. Taamaattumik naalakkersuinikkut qinersinissap massakkut orniginartinneqarsimannginnera matumani naliliinermi tunngavilersuutigineqarsimasinnaassasoq takorloorneqarsinnaavoq, Sara Olsvig oqarpoq.
Siumumilu siulittaasuusimasup Lars-Emil Johansenip Sara Olsvig isumaqatigaa:
- IA Siumullu asaqatigiillutillu akerariittutut pissuseqartarnerat qularnanngitsumik pisariaqarsimavoq maannakkut oqarsimassasut: Pimoorutivillugu suleqatigiittariaqarpugut, nunarsuarmimi pissutsit atuuttut eqqarsaatigalugit maanna tamanna pisariaqarpoq, Lars-Emil Johansen oqarpoq.
Siumut nunanut allanut tunngasunut suliassaqarfimmiilersoq
IA-p Naleqqallu naalakkersuisoqatigiinnerat ataasinngornermi isavoq.
Tassunga taarsiullugu IA-p ilisimaneqalereersutut Siumut naalakkersuisoqatigilerpaa, Siumullu maanna sisamanik Naalakkersuisuutitaqaqqilerluni.
Siumumit Vivian Motzfeldip ilaatigut nunanut allanut tunngasunut naalakkersuisunngorpoq, susassaqarfik taanna Múte B. Egedep oqartussaaffigigaluarpaa.
AAMMA ATUARUK Ataatsimut isigalugu: Naalakkersuisunut ilaasortat nutaat aaku
Nunanut allanut tunngasunik suliassaqarfik taannaavortaaq partiit taakku marluk naalakkersuisooqatigiilernerminni isumaqatigiinngikkaluarlutik pingaarutilittut isumaqatigiissutigigallagaattut taaneqarsinnaasoq, Sara Olsvig oqarpoq.
- Taassuma tassunga ikkunneqarnera immikkut maluginiagassatut taarusuppara, nalunanngilarmi Inuit Ataqatigiinniit aamma tigummerusunneqaraluartoq, Sara Olsvig oqarpoq, taassumalu Siumup naalakkersuisuuffik taanna tigujumasimassagaa eqqoriarpaa.
- Piffissaqarfiginerullugu ingerlanneqarsinnaanera tassani isumaqarpunga pitsaasuusoq, kisiannili immikkut maluginiarpara Siumup tigusimammagu, eqqoriarparalu aamma immikkut piumasarisimassagaat, Sara Olsvig oqarpoq.
