Politikkikkut alaatsinaatsup, Naalakkersuisooqatigiilersussat patajaatsuussanerpai
Ukiup ataatsip matuma siorna apriilip 16-iani, ukiuni sisamani patajaatsumik suleqatigiikkumalluni neriorsoqatigiissimaneq, partiit siuttuisa marluk Múte B. Egedep, Naleqqallu siuttuata Hans Enoksenip suleqatigiissinnaajunnaarnerat peqqutigalugu kipitinneqarpoq.
IA-li patajaatsumik ingerlaqqissaguni maanna Siumukkut ingerlaqatigerusunneruai.
- Tamanna tupaallaatissaanngilaq, kalaallit politikkiat pillugu ilisimasaqarluartoq Kaj Kleist naliliivoq.
Taassuma naliliinera naapertorlugu, ukiup ataatsip ingerlanerani Naleqqamik suleqateqarneq Atassummillu ikorfartorteqarneq sangujoraartumik ingerlasimavoq.
- Partiit taakku pingasuullutik siuttuunerminni suleqatigiissutiginiagaat annertugisassaanngillat, taamaattumillu ukiup kingulliup naalernerani Atassutikkut tunuarnerat tupinnarpallaanngilaq, taamalu aamma Naleraq IA-miit peersinneqarluni, Kaj Kleist naliliivoq.
IA-li Nalerarlu ataatsimik ataatsimoorussaqaraluarput, tassalu inatsimmik nunatsinni URAN-imik qalluisoqarnissamut akuersissuteqartoqannginnissaanut isumaqatigiikkamik.
Tassungalu tunngasoq Siumup akerleraa, isumaqataannginninilu maanna tunuartillugu, taannaavorlu ippassaq tusagassiortunik katersortitsisoqarnerani Siumumi siulittaasup Erik Jensenip qularutiginagu oqaatigisaa, aammalu Kaj Kleistip maluginiagaa.
- Siumut Naalakkersuisunut iserumalluni tupissutigisinnaasaminik allaat iisigunarpoq, taanna oqarpoq.
Partiit annerit marluk pissaaneq avissavaat
IA Siumullu katillutik 22-nik Inatsisartuni qinigaatitaqarput, partiitullu annertut marluullutik qinigaaffiup piffissaata sinnerani nunatta politikkikkut siunnerfiinik ersoqatigiittussanngorlutik.
Naalakkersuisoqatigiit nutaat pillugit paasissutissat
Siumut aamma IA Inatsisartuni atuuffinnut 31-nut 22-nik qinigaatitaqarlutik maanna amerlanerussuteqarput.
Partiit taakku marluk siusinnerusukkut naalakkersuisoqatigiinnikuupput. Tamanna 2016-imit 2018-imut pivoq. Naleraq aamma naalakkersuisoqataavoq
2020-mi qinersisoqarpoq. Naleraq IA-lu naalakkersuisoqatigiinnissamik isumaqatigiissuteqarlutik 31-nit 16-inik qinigaatitaqarput. Atassut partiitut ikorfartortaavoq.
Atassut siorna novembarimi ikorfartortaajunnaarpoq.
Siumut maanna sisamanik Naalakkersuisuutitaqalissaaq. Siumuttaaq Inatsisartuni siulittaasuuffeqassaaq - Naleqqamit Hans Enoksen tassani ullumikkut siulittaasuuvoq.
Naleraq ullumikkumut pingasunik Naalakkersuisuutitaqaraluarpoq.
Taakkuullutilli ataannarnissaat isumalluarnartoqartoq Kaj Kleistip nalilerpaa.
- Inatsisartut 22-nik qinigaatitallit eqqarsaatigissagaanni, ukiut aggersut pingasut neriunartoqarsinnaapput naalakkersuisoqatigiit atalluarsinnaanissaannut, qinersisartullu iluaqutissaannik taamaalillutik inerisaaqatigiillutik, taanna oqarpoq.
Oqaluuserisassammi arlaqartut, naalakkersuisooqatigiilertussanit taakkunannga naammassilluarneqarsinnaasorai.
Soorlu Namminersorlutik Oqartussat allaffissuanni kalaallit oqaasiisa salliutinneqarnissaannut anguniagaq pineqartillugu aammalu aalisarnermut inatsisissap nutaap piviusunngortinissaanut tunngatillugu.
- Qulequttat taakkua marluk partiit patajaatsumik suleqatigiinnissaannut iluaqutaasinnaapput, Kaj Kleist oqarpoq.
Illuatungaali isigissagaanni, partiit taakku marluk akornanni qulequttamut Siumup akerlerisaanut tassa Urani pillugu inerteqquteqalernissamut isummat assorornarseratarsinnaapput, taannaavorlu ukioq kingulleq ukiaanerani ataatsimiinnermi IA-p inatsisissatut akuersissutigisaa.
Akerleriissutaarsorlu taanna Siumup siulittaasuata Erik Jensenip ataasinngornermi tusagassiortunik katersortitsinermi ima oqaasertalerpaa:
”Apeqqut taanna massakkut illikartilaarallarparput”.
