Tobias Ignatiussen nannunik takornariartitsisalerusuttoq: Misilittagaqartut kisimik nannunik takornariartitsisassasut neriuutigaara

Nannut pillugit nalunaarut nutaaq, ilaatigut nannunik piniarnertaqanngitsumik akiliisitsilluni takornariartitsisinnaalersitsisuusoq, Naalakkersuisut sapaatit akunnerata siuliani akuerimmassuk uitsatigineqaqaaq.

Tasiilamilu piniartup saniatigooralugulu takornariartitsisartup, Tobias Ignatiussenip, tamanna aamma nuannaarutigaa.

Nannunimmi nunatsinni takornariartitsisoqarsinnaalernera, taassuma isumassarsialatsialaasoraa. Taassuma nannut piniagaruligullu nerisarereeramigit iluaqutigereerpai.  

- Uanga assersuusiareriaruma nammineq, saniatigooqarpunga takornarialerisuusarlungalu, takornariat peqanngiffiata nalaani piniartuullungalu aalisartuusarpunga. Isumaqarpunga taanna nannunik takusaasarnissaq isumassarsiatsialaasoq, aningaasaq takutissaaq pinianngikkaluarlugu nanoq. Annertuumik aningaasarsiutigisinnaavoq nannuminngarnit, taanna KNR-imut oqaroppq.

Tasiilami eqqaanilu nannuttassat ukiumut 25-usarmata nannutassat ukioq aallartisimatsiaannartoq tamakkereerneqartartut, Tobias Ignatiussen oqarpoq.

Taamaammat piffissap sinnera nanoqarfiulluartarmat takornarianut atorluarneqarsinnaasoq, taanna isumaqarpoq.

Nannumik qaninngarneqartoq

Nannulli ulorianaateqarsinnaanerat tusarnartaanngilaq.

Tobias Ignatiussen nulianilu 2020-mi angalatillutik nulia nannumik qaninngarneqarpoq. Tobias Ignatiussenilli ungasianiit qimaasarsinnarlugu naggataatigut pisaraa.

Taamaammat inunnik navialisoqassanngippat misilittagaqartut kisimik nannunik takornariartitsisassasut, Tobias Ignatiussenip neriuutigaa.

- Neriuppunga sungiussisimasut taamannak aatsaat angallassisassasut. Imaanngitsoq maannga tikillunilu misilittagaqanngitsoq tassunga tungaani saatissagaanni misigisimanarsinnaammat aammalu ajortumik kinguneqarsinnaalluni. Neriuutigivara inuit misilittagaqartut tassunga angallassisarumaartut, taanna oqarpoq.

Misilittagaqarnissaq piumasaqaataanngitsoq

Nannunik qarmaaneq, naapinniaaneq, malersuineq allatulluunniit akornusiineq maannamut inerteqqutaavoq. Nalunaarulli nutaaq naapertorlugu tamanna allanngorpoq.

Kisianni Nunanut Allanut, Inuussutissarsiornermut Niuernermullu Naalakkersuisoqarfiup nalunaarutaa naapertorlugu nannunik takornariartitsisalerusuttunut piumasaqaatit marluinnaasut, sapaatit akunnerata siuliani pingasunngornermi oqaluttuaraarput.

Tassa nannunik takornariartitsisalerusuttut misilittagaqarnissaat piumasaqaataanngilaq.

Nannulli pillugit nalunaarut nutaaq ilutigalugu nannunik nunatsinni takornariaqartitsisisoqarsinnaalernera nunatsinni nannunillu takornariartitsisalersussani aningaasarsiutaalluarsinnaassasoq, Tobias Ignatiussen isumaqarpoq:

- Pinianngikkaluarlugu takutitassiarisinnaanera periarfissatsialaavoq, soorlu piniarsinnaajunnaarallarnerup nalaani. Taamaattumik toqunngikkaluarlugu uumatillugu aningaasarsissutigisinnaagutsigu iluassaqaaq, taanna oqarpoq.

Nannunik piniarneq illersuinerlu pillugit Namminersorlutik Oqartussat nalunaarutaat nutaaq Naalakkersuisunit marsip arfernani akuerineqartoq atulereerpoq.