Nannunik takusassarsiornissaq periarfissaalerpoq: Nannut pillugit ilisimasaqartoqartariaqanngilaq

Takorluuilaariarit.

Takornariat allat umiatsiamut ikeqatigalugit illoqarfimmiit aallarputit.

Illoqarfik qimallugu sissamut tulappusi nioriarlusilu takornariartitsisoq aallaammik tigummiartoq nunakkut pisoqatigilerlugu.

Sivitsunngitsoq takusaqarpusi. Kalaallit Nunaata usorsisimaarutaa; nanoq.

Taama takorluuisarneq naliginnaasuunngilaq. Tassami nannunik takornariartitsisarnissaq oqartussanit akuerisaanikuunngisaannarpoq.

Tamannali oqaluttuaannanngortussanngorpoq tassami Aalisarnermut Piniarnermullu Naalakkersuisoqarfimmit nannut pillugit nalunaarummi nutaami tamanna periarfissiissutaalermat.

Takornarialerisunut isumannaallisaanermut piumasaqaateqartoqanngilaq

Nannunik qammaasarnerit, ujartuisarnerit, malersuisarnerit allatulluunniit eqqissiviilliortitsinerit maannamut inerteqqutaapput.

Tamannali qanoq paasisariaqarnersoq takornariartitsisartut namminneerlutik nalilersugassaraat. Marlunnillu piumasaqaateqartoqartoq, Nunanut Allanut, Inuussutissarsiornermut, Niuernermullu Naalakkersuisoqarfiup immikkoortortaqarfiani aqutsisup, Marte Lonap erseqqissaassutigaa:

- Nannunik takornariartitsissagaanni taamatut piginnaaneqartariaqarpoq uangullu tungitsinniit soqutigisaraarput takornariartitsisartut suliaminnik ilisimasaqarluarnissaat. Piumasaqaalli ataasiinnaavoq tassa akileraartarnissaq tamatumalu saniatigut Kalaallit Nunaanni najugaqarnissaq piumasaqaataalluni, Marte Lona KNR-imut oqarpoq.

Tassa nannunik ilisimasaqarnissaq piumasaqaataanngilaq?

- Inatsimmi piumasaqaat ataasiinnaavoq tassa, nannut 200 meterit sinnernagit qanillineqassanngitsut. Piumasaqaatit allat Aalisarnermut Piniarnermullu Naalakkersuisoqarfiup ataaniipput.

Aalisarnermut Piniarnermullu Naalakkersuisoqarfimmit oqartitsiniaraluarpugut, massumali allaaserisap saqqummersinneqarnissaa sioqqullugu tamanna pisinnaasimanngilaq.

Nannunit saassunneqarnermi qanoq iliortoqarsinnaanera

Pinngortitaleriffiup miluumasut timmissallu pillugit immikkoortortaqarfiani aqutsisoq, Fernando Ugarte isumaqarpoq, nannunik takusassarsiortitsisalernissaq Kalaallit Nunaata aningaasaqarneranut iluaqutaaginnarani aamma takornariartitsisarfinnut iluaqusiiumaartoq.

Taamaattorli Aalisarnermut Piniarnermullu Naalakkersuisoqarfik marlussunnik isumaliutigilluagassaqartoq, Ugarte erseqqissaavoq:

- Nannunik takusassarsiortoqartalissappat tamassuma nakkutigilluarneqarnissaa pingaaruteqarpoq, taamaaliornermi nannut sumiiffinnit qimaatinneqannginnissaat aamma nannut qanillivallaannginnissaat pingaaruteqaluni, Ugarte oqarpoq imalu nangilluni:

- Nannunik takusassarsiortarneq nakkutigineqarluarpat tamanna takornariartunut pitsaanerpaassaaq aamma takornarialerisut misilittagaqarluartut kisimik takornariartitsisarnissaat pingaaruteqaluni. Paasisakkalu naapertorlugit takornariartitsisartussatut qinnuteqarnermi akuerineqaqqaarluni aatsaat taamaaliortoqarsinnaavoq, Fernando Ugarte oqarpoq.

Takornariartitsisoqartalerpat tamanna nannut eqqissisimaartarnerannut akornusiisinnaanngila?

- Taamaattumiguna isumaqartunga takusassarsiortitsisarnissaq killilersorneqartariaqartoq. Takusassarsiortitsisartullu ikittunnguit akuerineqarpata tamanna pitsaanerpaassaaq, Ugarte oqarpoq.

Nannut pillugit nalunaarutip suliarineqalinnginnerani Nunanut Allanut, Inuussutissarsiornermut, Niuernermullu Naalakkersuisoqarfik Pinngortitaleriffimmit siunnersorneqarnissartik kissaatigisimagaat, Fernando Ugartep KNR-imut oqaatigaa.