MIO-mut saaffiginnittut amerlisut: Nunatsinni meeqqat tamakkerlugit suli ikiorsersinnaanngikkigut nassuerutigisariaqarparput
598-it. Meeqqat pisinnaatitaaffii pillugit sullissivimmut MIO-mut 2020-mi saaffiginnissutit taama amerlatigipput.
Taakkulu 2016-imi saaffiginnissutinit 107 procentimik amerlanerupput.00:00:24
Tamanna meeqqat amerlavallaartut pisinnaatitaaffimmisut ikiorneqannginnerannik takussutissaasoq, Meeqqat Illersuisuat, Aviâja Egede Lynge, oqarpoq.
AAMMA ATUARUK MIO nunatsinni ulluunerani paaqqinniffiit pitsaassusaat politikkikkut ukkatarineqaqqugai
- Uani tamakkiisumik oqartoqarsinnaavoq, saaffiginnittartut allamut saaffissaarutivillutik misigalutik nukissaarutivissimallutik saaffiginnittartut. Tusaaneqarnatik allamullu saaffissaarutivissimallutik misigisimasarput, Aviâja Egede Lynge oqarpoq.
MIO-mut saaffiginnissutini amerlanerit kommunit sullissinerannut, angajoqqaatut akisussaanermut, atuarfinnut paaqqinnittarfinnullu tunngasunut apeqqutinut, kinguaassiuutitigut atornerluisoqarsimanermut nakuusernermullu tunngassuteqarput.
MIO sunaava?
MIO Kalaallit Nunaanni meeqqat pisinnaatitaaffii pillugit sullissiviuvoq.
MIO upernaakkut 2012-imi pilersinneqarpoq.
MIO Naalagaaffiit Peqatigiivisa Meeqqat pillugit isumaqatigiissusiaat aallaavigalugu sulivoq, pissusissamisoortumillu meeqqat inuusuttullu atugarliortut sallinngorlugit sammissavai.
MIO’mi Meeqqanik Illersuisoq aammalu allaffeqarfik arfinilinnik atorfilinik sulisoqarpoq.
Paasissutissat: mio.gl
Iliuuseqartoqarnerusariaqartoq
Taama saaffiginnittoqartarnera meeqqat inersimasullu sullinneqarnerisa sivisunerannut oqartussallu iliuuseqarnissaannut ilaannikkut inerneqanngitsumik utaqqisarsinnaanerannut takussutissaasoq, Aviâja Egede Lynge nassuiaavoq.
- Meeqqanut ikiorsiinissamik inatsisip nunatsinni malilertariaqarnissaanut annertunerujussuarmik iliuuseqartariaqartugut takutippaa. Kommuniniit iliuuseqartoqarniartoq nalunngilara, aamma assersuutigalugu Danmarkiminngaanniit allaat ikiortilluta suliaq ingerlasoq nalunngilara. Kisianni suli amigaateqartugut uppernarseqqiinnarpara. Suli kivissinnaanngilarput, Aviâja Egede Lynge oqarpoq, nangillunilu.
- Meeqqat tamarmik maani nunatsinni suli ikiorserneqarsinnaanngitsut nassuerutigisariaqarparput.
Taamaammat kommunit inatsisinik malitaqarsinnaalersinniarlugit Namminersorlutik Oqartussat aningaasaqarnikkut sulisoqarnikkullu qulakkeerigaqarnissaat MIO-p inassuteqaatigaa.
Oqarasuaatikkut oqaloqateqarneq naammanngitsoq
Meeqqat inersimasullu inuuniarnikkut artorsartut amerlanernik saaffissaqarnissaat pisariaqartoq, Meeqqat Illersuisuat oqarpoq.
- Oqarasuaatikkut tusarneqarnissaq inuppassuarnut uagut oqaloqatigisartakkatsinnut naammannginnami. Inuttut ilaqutariittut naapinneqarnissaq pisariaqartinneqartorujussuuvoq.
- Taamaammat iliuutsit pitsaagaluartut saniatigut inuit taamatut atugallit saaffigisinnaasaannik aamma suli pisariaqartitsivugut. MIO-p kisimiilluni taanna tigummisinnaanngilaa, Meeqqat Illersuisuat, Aviâja Egede Lynge, oqarpoq.
AAMMA ATUARUK MIO innersuussutit pillugit: Alloriarnertut siullertut isigaarput
MIO-p siunnersuisarnissaq suliassarigaa, sulianullu ataasiakkaanut akuliussinnaanngitsoq, Meeqqat Illersuisuata erseqqissaatigaa.
MIO-p saaffiginnissutinut nalunaarusiaa uani atuarsinnaavat.