MIO innersuussutit pillugit: Alloriarnertut siullertut isigaarput

Meeqqat inuusuttullu atugarliortut ikiorniarneqarnissaanut ulloq pingaaruteqarpoq.

Naalakkersuisut qallunaat naalakkersuisui suleqatigalugit innersuusiaat 16-it atuareerlugit Meeqqat Illersuisuat taama qisuariarpoq.

- Pimoorussineq taavalu piviusunngortitserusunneq ersarissoq takutinneqarmat nuannaarutigaara. Taannaammat ukiorpaalussuit maqaasinikuusarput, Aviâja Egede Lynge oqarpoq.

AAMMA ATUARUK Ataatsimut isigalugu: Meeqqanut inuusuttunullu atugarliortunut atatillugu innersuussutit 16-it

- Aallarniutitut isigivarput. Meeqqat nunatsinni atugaat aaqqinniartillugit suliaq angisooq alloriarnerillu amerlasuut pisariaqartinneqarput. Unalu imatut isigivarput alloriarnertut siullertut, Aviâja Egede Lynge oqarpoq, innersuussutillu 16-it naammannginnerarlugit.

Innersuussutit suliarineqarnissaat isumaginninnermut naalakkersuisup Martha Abelsenip (S) danskillu isumaginninnermut ministeriata Astrig Kragip (Soc) Nuummi siorna oktobarip qaammataani atsioqatigiissutigaat.

Innuttaasut pigisaannik peqartariaqartoq

Innuttaasunik peqataatitsinerunissaq innersuussutini Meeqqat Illersuisuata maqaasivaa.

- Meeqqanik inuusuttunik innuttaasunillu peqataatitsinissaq pingaaruteqarluinnarami. Taanna takujuminaatsilaarpara uku piviusunngortinniarnerani qanoq aaqqiiniarnissanut peqataatinniarneqassanersut.

Innersuussutit sulinermi periutsinut qanoq pitsanngorsaanissamut samminnippallaartut taanna isumaqarpoq.

- Innuttaasut nalunnginnerpaarpaavaat qanoq innerlutik. Ajornartorsiutit ataavartumik qaangerniassagutsigit, qallikkut aaqqiiniapallanneq ukiorpassuit ajornartorsiutiginikuusarput qimassagutsigu, innuttaasunik peqataatitsisariaqarpugut. Innuttaasullu pigisutut misigisinnaasatsinnik peqalinngikkutta siunissami nikeriaqqinnissaq ajornakusoortorujussuusinnaasoq isumaqarpunga.

Innersuussutit 16-it uani atuarsinnaavatit.