Mette F.: Kalaallinik sunniiniartoqarnera pillugu USA-miit miserratiginninneq ilungersunartoq
Amerikamiut, minnerpaamik pingasut, Kalaallit Nunaanni sunniiniarlutik iliuuseqarnerat ministeriunerup Mette Frederiksenip (S) ilungersunarujussuartutut isigaa.
- Kunngeqarfik Danmarkip kalaallillu oqartussaaqataanerata akornanni pissutsinut akuliunniarneq sunaluunniit akuerineqarsinnaanngilaq, Mette Frederiksen til DR-imut oqarpoq.
- DR-ip ullumikkut saqqummiussineratut pisoqannginnera amerikarmiuniit miserratigineqarnera maluginiarpara, tamannalu soorunami ilungersunartuuvoq.
Ministeriunerup DR-imut oqarneratut, tamanna "USA-mi suleqataannut toqqaannartorujussuarmik" oqariartuutigineqarumaarpoq.
DR-ip pingasunngornermi paasissutissiisut kinaassutsiminnik isertuusserusuttut arlallit paasissutissiinerat naapertorlugu, angutit USA-mi præsidentimut Donald Trumpimut attuumassutillit, Kalaallit Nunaat - Trumpimiit piffissami sivitsortumi USA-mut atalersinneqarusuttoq, akuliuffiginiarsarigaat.
Angutit taakku kisimiillutik taamaaliornersut DR-imiit paasineqanngilaq.
Nunat tamalaani malittarisassat malinneqanngitsut
DR-ip nutaarsiassiinerata kingorna, amerikamiut chargé d'affaires-iat Lars Løkke Rasmussenimit (M), Danmarkimi nunanut allanut ministereqarfimmi oqaloqatigiinniissamut pingasunngornermi aggersarneqarpoq.
Oqaloqatigiinnermilu "Sunniiniarnerit ingerlanneqartut arlaannaatigulluunniit pisortaniit peqataaffigineqarpata tapersersorneqarpataluunniit, taamaaliorneq nunani tamalaani malittarisassanik unioqqutitsinerusoq USA-mut erseqqissaatigineqassasoq" tamannalu danskiniit erseqqissaatigineqarumaartoq, Lars Løkke Aalborgimi matup killinganiit oqarpoq.
Mark Stroh Danmarkimi USA-p aallartitaqarfiani amerikamiut chargé d'affaires-erivaat. Alan Leventhal januarimi atorfimminiit taamaatimmalli, USA Danmarkimi maannamut aallartitaqanngillat.
Chargé d'affaires-eq tassaavoq atorfilittaq qaffasissumik inissisimasoq aallartitamiilli appasinnerusumi inissisimasoq.
Akuerineqarsinnaanngitsoq
Mette Frederiksen USA-p Senatianiit sinniisunik pingasunngornermi oqaloqateqarsimalluni DR-imut oqarpoq.
- Tamanna akuerineqarsinnaannginnera erseqqissorujussuarmik oqaatigaarput, Mette Frederiksen oqarpoq.
Senatimiit sinniisut kikkut qassillu naapissimanerai paasineqanngilaq. Taakkuli pilersaarutaareersumik Danmarkimut tikeraarput, Danmarkimiinnerallu suliamut uunga attuumassuteqanngilaq.
/ritzau/
