PET: Kalaallit Nunaat avissaartuutsitsiniarluni sunniiniarnernit sunnerniarneqarpoq

Politiit isertortumik paasiniaasartui (PET) naapertorlugit nunatta Danmarkillu akornanni eqqissiviilliortitsinissamik siunertaqartumik nunarput sunnerniarneqarpoq.

Taama PET DR-imut akissuteqarluni allappoq.

- Isumaqatigiinngissutit pioreersut isumaqatigiinngissutilluunniit piviusuunngitsut atorlugit tamanna pisinnaasoq PET-ip nalilerpaa, assersuutigalugu sulianut ataasiakkaanut ilisimaneqartunut atatillugu imaluunniit Kunngeqarfik, USA nunalluunniit allat Kalaallit Nunaannut immikkut soqutiginartut pillugit Kalaallit Nunaanni isummanik aalajangersimasunik siuarsaanerit sakkortunerulersitsinerilluunniit aqqutigalugit, PET allappoq.

Amerikamiut angutit aalajangersimasut nunatsinni iliuuserisimasaat pillugit oqaaseqaateqarnissamik DR-ip PET piumaffigisimavaa.

Nunatsinni sunniiniarnerit

Tusagaqarfiusut arlallit naapertorlugit amerikamiut minnerpaamik pingasut præsidentimut Donald Trumpimut attuumassuteqartut nunatsinni sunniiniarnermik suliaqartarput.

Taakku ilaasa ilaatigut Trumpip nunatsinnik pisinissamik isumassarsiaanik tapersersuisut aqqi katersorsimavai.

Tusagaqarfiusut naapertorlugit aamma taanna Danmarkip tusagassiuutitigut ajortunngortinnissaanut sammisat atorneqarsinnaasut pillugit kalaallinik oqaluttuartitsisimavoq.

Assersuutigalugu kalaallit meerartaannik pinngitsaaliilluni Danmarkimi arsaarinninnerit spiralilersuinermillu suliaq pineqarput, tassanimi kalaallit niviarsiaqqat arnallu 1960-ikkunni 70-ikkunnilu akuersissuteqaratik spiralilersorneqartarput.

DR-ip oqaluttuaa paasissutissanik kinaassutsiminnik isertuussisunik arfineq-pingasunit aallaaveqarpoq. DR naapertorlugu paasissutissat taakku naalakkersuisunit oqartussaasunillu kiisalu nunatsinni USA-millu tusagaqarfinnit aallaaveqarput.

Angutit taakku namminneq iliuuseqarsimanersut peqquneqarsimanersulluunniit, DR-ip paasinarsarsinnaasimanngilaa.

Amerikamiut naalakkersuisui nunatsinni sunniiniarnissamik amerikamiut innuttaasuinut peqqussuteqarsimanersut, DR-ip Det Hvide Hus aperisimavaa.

Det Hvide Hus DR-ip saaffiginnissutaanut akissuteqanngilaq.

Lars Løkke oqaloqatigiinnissamut aggersaasoq 

Innuttaasut ataasiakkaat iliuusaat Amerikami naalagaaffeqatigiinniit nakkutigineqanngitsut, amerikamiullu ataasiakkaat Kalaallit Nunaanni soqutigisaqarsinnaasut, Københavnimi amerikamiut aallartitaqarfiani sinniisoq DR-imut allappoq.

Naalagaaffeqatigiit iluani pissutsinut akuliunniarnerit tamarmik akuerineqarsinnaanngitsut, Danmarkip nunanut allanut tunngasunut ministeriata Lars Løkke Rasmussenip (M) erseqqissarpaa.

Taamaattumik nunanut allanut tunngasunut ministerip amerikamiut chargé d'affaires-ii oqaloqatigiumallugit Danmarkimut aggersarsimagai, nunanut allanut ministereqarfimmiit Ritzauimut pingasunngornermi ilisimatitsissutigineqarpoq.  

Chargé d'affaires-eq tassaavoq atorfilittaq qaffasissumik inissisimasoq aallartitamiilli appasinnerusumi inissisimasoq.

Ken Howery Danmarkimi aallartitassatut nutaatut Donald Trumpimiit innersuunneqarnikuvoq, Howerylli politikkikkut akuersissutissat pisariaqartinneqartut suli pissarsiarinikuunngilai taamaattumillu suli sulilinngilaq.

/ritzau/