- Kiisami. Kiisami danskit naalagaaffiata piffissarujussuaq atorneqareersorlu utoqqatsernermigut eqqunngitsuliorsimanerminut akisussaaffini massakkut nassuerutigivaa, Múte B. Egede taama oqarpoq.

Utoqqatsernerli alloriarneriinnaasoq, suliarlu suli naammasseqqajanngitsoq, taanna isumaqarpoq.

- Aamma isumaqarpunga, arnat pineqartut eqqunngitsuliorfigineqarsimasut taarsiiffigineqarnissaminnut piumasaqaataat, aamma taanna danskit naalagaaffiata utoqqatsernermigut nassuernermigullu, alloriarfigeriikkani aallaavigalugu aamma naammassisariaqaraa.

Spiralilersuisarsimanermut suliaq Múte B. Egedep naalakkersuisunut siulittaasuunerani aallartippoq, danskillu naalakkersuisuinut sakkortuuliornermut aallaaviusarsimalluni. Ilaatigut Múte B. Egedep spiralilersuineq inuiannik nungusaanermik taanikuuaa. 

Múte B. Egedelli isummiunnikuusani attallugu oqarpoq, naalakkersuisulli sinnerlugit taama oqarnani erseqqissaassutigalugu.

Spiralilersuisimanermi kingunerluuteqartorujussuusoq taanna isumaqarpoq.

- Isumaqarpunga suliaq una inuiaqatigiinnut annertuumik aammalu minnerunngitsumik eqqornerlunneqarsimasunut annertuumik sunniuteqarsimasoq inuiaqatigiinni arlaatigut malugiuarumaaripput. 

Spiralilersuisimanerlu Danmarkip utoqqatserneratigut oqallisigineqarunnaarnavianngitsoq, Múte B. Egede oqarpoq. Spiralilersuisimanermummi qulaajaaneq maanna naammassijartuaarpoq.

- Qularnanngilaq oqallinneq taassuma kingorna peqqittussaassasut. 

Aamma naalakkersuisut utoqqatsissuteqarput. Peqqinnissaqarfiummi nunatsinnit akisussaaffigineqalereernerata kingorna spiralilersuisoqarsimanera paasineqarnikuuvoq.

- Nunatsinninngaanniit peqqinnissaqarfiup ingerlatilerneraninngaanniit taamatut naartunaveersaasersuisarsimanermut aamma iliuuseqartoqarsimaneranut akisussaaffimmik tigusisoqarpoq. Aammalu aningaasanut inatsimmi ilaatigut toqqammavilerneqareertumik taarsiiffiginnisinnaanermut periarfissaq ammaanneqareerluni. Taakku akisussaaffimmik tigusinertut isigaakka.