Meeraqanngitsut pissangallutik utaqqipput. Allagarsiaqanngillalli
![](/sites/default/files/styles/image_934x467/public/2024-04/IVF-chargruppe%203.jpg?itok=xQKE_Cv_)
- Asasara Maannguaq aappallu. IVF-imut najoqqutassat nutaat suliarineqartut paasissutissiissutigisinnaavarput. Suliaq naammassineqarpat siusinnerpaamik attavigineqarumaarpusi. Inussiarnersumik inuulluaqqusilluta, Gynækologiimut immikkoortortaqarfik.
Maannguaq Birchip Dronning Ingridip Napparsimmavissuata Gynækologiip immikkoortortaqarfianit mailikkut allagarsiani nipituumik atuarpaa.
Maannalu qaammat sinnereerpaa.
- Maajip aappaaniilli peqqinnissaqarfimmit suli tusagaqaqqinngilagut, 35-nik ukiulik Maannguaq Birch oqarpoq.
Taanna aappanilu meerartaarusullutik ukiorpassuit ilungersuuteqarput.
Taamaammallu aamma aappariinnut meerartaarusukkaluartunut katsorsartinnissamut 3 millionit koruuninik Danmarkimut angalanissamut, inissaqartinneqarnissamut kinguaassiorsinnaanerlu pillugu katsorsartinnissamut matussusiisinnaasunik naalakkersuisut apriilimi nalunaarutigisaat qiimmaallannarsimavoq.
- Ajunngitsumillu ingerlassappat aningaasanut inatsimmi 2025-moortumut ilanngutivissasoq, peqqissutsimut naalakkersuisoq Agathe Fontain taamani KNR-imut oqarpoq.
Politiikerilli nuannersumik oqariartuuteqareernerata kingorna qaammatit marluk qaangiummata suli susoqarpallaanngilaq.
Naak katsorsartittussaq siulleq qaammatip tulliani - tassa maajip ingerlanerani katsorsartikkiartortinneqassasoq Dronning Ingridip napparsimavissuani nakorsat pisortaat Aviaja Siegstadip apriilip naanerani oqaatigigaluaraa.
- Ukioq manna qulit angumerisinnaagigut isumaqarpunga, nakorsat pisortaat KNR-imut taamani oqarpoq nangillunilu:
- Sinaakkutissat inissereeriarpata aaqqissuussap amerlanerusunut atuutsilernissaa naatsorsuutigaarput.
Akissutissarsinissaq kinguartinneqarpoq
Maannguaq Birch allarpassuillumi kinguaassiorsinnaanermik katsorsartittussat utaqqisorpassuit Facebookimi allaqatigiittarfimmi imminnut killiffiminnik paasissutissiikulapput.
Maannguaq Birchillu ilisimavaa nammineq eqimattaqatimeeqatinilu Gynækologiip immikkoortortaqarfianit maajip aappaani assigiilluinnarmik allagarsisimallutik.
- Taakkunannga akissummik utaqqisussaasugut inuit marluulluta paasitinneqarpugut. Kisiannili suli tusagaqanngilagut. Aamma maajip 22-iani allaffigeqqippagut, taanna oqarpoq.
Allakkaminillu apuussimaneranik uppernarsaammik kisimi allagarsivoq, sapaatip akunnerillu marluk pingasulluunniit iluanni akineqarnissani naatsorsuutigisinnaagaa.
Katsorsartittussaq siulleq piareerpat Kalaallit Nunaata Peqqinnissaqarfia IVF-imik katsorsartiffissamut Rigshospitalimut Danmarkimiittumut sianiinnassasut Rigshospitalip apriilimi paasissutissiissutigaa.
- Kalaallit Nunaannit katsorsartikkiartortussanut unittoorfiorusunngilagut. Taamaattumillu taakkununnga utaqqiviussanngilaq, Rigshospitalip qitornartaarusuttut passutsittarfianni nakorsaanerit pisortaa oqarpoq.
Piareersarneq piffissatorpoq
Katsorsartittussanut sullissisussanut malittarisassap suli piariinnginnera "unittooqqassutaasoq" aallartitsiniaasaartitsisuusorlu Dronning Ingridip Napparsimavissuani nakorsat pisortaat, Aviaja Siegstad isumaqarpoq.
- Nakorsiartitsinermut malittarisassat piareertinnagit katsorsaanermik aallartitsisinnaanngilagut, taanna KNR-imut oqarpoq.
- Aallaqqaammut nakorsiartussat Rigshospitalimukarlutik katsorsartinnginnerminni misissorteqqaarnissaat naammasseqqaassapput. Taamaanngippammi ajornerpaamik pisoqassappat nakorsiartussat itigartinneqarsinnaammata.
Peqqinnissaqarfiup aappariit meeraqanngitsut salliuttorujussuugaat, kisiannili piareersarneq piffissatortoq, Avaja Siegstadip naqissuserpaa.
Taamaammallu Maannguaq Birch Danmarkimut katsorsartikkiartorluni qaqugu aallarsinnaanersoq oqaatigiuminaappoq.
- Sapaatip akunnerisa tulliuttuni unnersuunneqarnissani naatsorsuutigisinnaavaa. Kingornalu Rigshospitalip unnersuussutigissavaa, pisussanik aaqqissuutissavaat, kingorna allagarsissaaq. Qaqugulu taakku suliaat naammassissanersoq oqaatigisinnaanngilara, Aviaja Siegstad KNR-imut oqarpoq..